ಭ್ರಮರ

ಟ್ರ್ಯಾಕ್ ಮತ್ತು ದೂಧ ಸಾಗರ್

2009-08-08T12:09:00.000-07:00

ತ್ರಿ ಧರ್ಮೀಯ ಸಿದ್ದಿಯರು

2009-07-28T06:47:00.000-07:00

ಪರ ನೆಲದ ಬುಡಕಟ್ಟು ಜನಾಂಗವೊಂದು ತಮ್ಮ ಅರಣ್ಯ ಪ್ರದೇಶದಲ್ಲಿ ಶತ ಶತಮಾನಗಳಿಂದ ನೆಲೆಯೂರಿ ಭಾರತೀಯ ನಾಗರಿಕರಾಗಿದ್ದಾರೆ. ಪರಿಸ್ಥಿತಿಯ ಒತ್ತಡಕ್ಕೆ ಸಿಲುಕಿ ಅನಿವಾರ್ಯವಾಗಿ ಇಲ್ಲಿಗೆ ಬಂದ ಅವರು ಧಾರ್ಮಿಕ ನೆಲೆ ಹುಡುಕಿ- ಕಟ್ಟಿಕೊಂಡಿದ್ದಾರೆ. ಒಂದೇ ಮೂಲ, ನೆಲದ ಅವರು ಜೀವನದ ಪಯಣದಲ್ಲಿ ತಮ್ಮದಲ್ಲದ ಧರ್ಮ ಸ್ವೀಕರಿಸಿ ತ್ರಿ ಧರ್ಮ ಅನುಯಾಯಿಗಳಾಗಿದ್ದಾರೆ. ಕಾಲ ಎಷ್ಟೇ ಗತಿಸಿದರೂ ಅವರು ನಮ್ಮ ನಡುವೆ ನಿಗ್ರೋ ಗುಣಗಳಿಂದ ಗುರುತಿಸಿಕೊಳ್ಳುತ್ತಾರೆ. ಗುಲಾಮಗಿರಿಯಿಂದ ಮುಕ್ತರಾಗಿ, ಸರ್ವ ವಿಭಿನ್ನತೆ ಮೀರಿ ಸ್ವಾತಂತ್ರ್ಯ ಕಂಡುಕೊಂಡಿದ್ದಾರೆ. ಹಿಂದೂ, ಕ್ರಿಶ್ಚಿಯನ್ ಅಥವಾ ಮುಸ್ಲಿಂ ಆಗಿದ್ದಾಗಲೂ ಧರ್ಮದ ರೇಖೆ ದಾಟಿ ತಾವು ಸಿದ್ದಿ ಜನ ಎಂಬುದನ್ನು ಅವರು ನೆನಪಿಸಿಕೊಳ್ಳುತ್ತಾರೆ.

ಸರ್ವ ಧರ್ಮ ಸಮನ್ವಯ ಸಿದ್ದಾಂತಕ್ಕೆ ಸಿದ್ದಿ ಜನಾಂಗ ಒಂದು ನಿದರ್ಶನ. ವ್ಯಾಪಾರಿಗಳ ಕೈಗೆ ಸಿಕ್ಕಿ ಲಕ್ಷಾಂತರ ಮೈಲಿ ದೂರ ಬಂದ ನಿಗ್ರೋ ಜನ ಸ್ಥಳೀಯತೆ ಮೈಗೂಡಿಸಿಕೊಂಡು, ಇಲ್ಲಿನ ಸಾಮಾಜಿಕ ವ್ಯವಸ್ಥೆಗೆ ಹೊಂದಿಕೊಂಡಿದ್ದಾರೆ. ಮೂಲ ಸಂಸ್ಕೃತಿ, ಸಾಮಾಜಿಕ ವೈಶಿಷ್ಟತೆ ಮರೆತು ಸ್ಥಳೀಯರಲ್ಲಿ ಬೆರೆತಿದ್ದಾರೆ.
ಶತ ಶತಮಾನಗಳ ಹಿಂದೆ ಉತ್ತರ ಕನ್ನಡ ಜಿಲ್ಲೆಯ ಯಲ್ಲಾಪುರ, ಶಿರಸಿ, ಸಿದ್ದಾಪುರ, ಹಳಿಯಾಳ, ಮುಂಡಗೋಡು ಮತ್ತು ಅಂಕೋಲಾ ತಾಲೂಕಿನಲ್ಲಿ ನೆಲೆ ಕಂಡುಕೊಂಡ ನಿಗ್ರೋ ಮೂಲದ ಸಿದ್ದಿಗಳು ಇಂದು ತ್ರಿ ಧರ್ಮಿಯರು. ಹಿಂದೂ, ಮುಸ್ಲಿಂ ಮತ್ತು ಕ್ರಿಶ್ಚಿಯನ್ ಧರ್ಮದಲ್ಲಿ ಸೇರಿದ್ದಾರೆ ಈ ಬುಡಕಟ್ಟು ಜನ.
ಸಿದ್ದಿಯರಿಗೆ ಮೂಲ ಧರ್ಮ ಇತಿಹಾಸ ಗೊತ್ತಿಲ್ಲ. ಈ ಬುಡಕಟ್ಟಿನಲ್ಲಿ ಇಂದು ಮೂರು ಧರ್ಮಗಳು ಸಮ್ಮಿಲಿತಗೊಂಡಿವೆ. ಧರ್ಮ ಸ್ವೀಕರಣೆಯಿಂದ ಬರುವುದೋ ಅಥವಾ ಪಾರಂಪರಿಕವಾಗಿ ಬರುವುದೋ ಎಂಬ ತರ್ಕಕ್ಕೆ ಸಿದ್ದಿಯರ ಧರ್ಮ ಸ್ವೀಕರಣೆ ಒಂದು ಚರ್ಚಾವಸ್ತು. ಸ್ಥಳೀಯರ ಸಂಪರ್ಕ, ಪ್ರಭಾವದಿಂದ ತ್ರಿ ಧರ್ಮ ಸ್ವೀಕಾರವಾಗಿದೆ ಎಂಬುದು ಮೇಲ್ನೋಟಕ್ಕೆ ಕಾಣುವ ಸಂಗತಿ. ಬುಡಕಟ್ಟು ಜನಾಂಗವೊಂದರಲ್ಲಿ ಜಾತ್ಯತೀತ ವ್ಯವಸ್ಥೆ ಕಾಣಬೇಕಾದರೆ ಅದು ಸಿದ್ದಿ ಜನಾಂಗದಲ್ಲಿ ಮಾತ್ರ.

ಮೂಲ:ಬಲಾಢ್ಯ ದೇಹ, ಕಪ್ಪು ಮೈಬಣ್ಣ. ಗುಂಗುರು ಕೂದಲು, ದಪ್ಪ ತುಟಿ, ಮೊಂಡು ಮೂಗು ಇರುವ ನಿಗ್ರೋ ಸಂತತಿಯ ಜನ ಆಫ್ರಿಕಾ ಮೂಲದವರು ಎಂಬುದು ನಿರ್ವಿವಾದಿತ. ಭಾರತಕ್ಕೆ ನಿಗ್ರೋ(ಸಿದ್ದಿ)ಗಳು ಬಂದ ಕುರಿತು ಹಲವು ಭಿನ್ನಾಭಿಪ್ರಾಯಗಳಿವೆ. ಅರಬರು, ಪೋರ್ಚುಗೀಸರು ಆಫ್ರಿಕಾ ಮೂಲದ ನಿಗ್ರೋ ಸಂತತಿಯ ಜನರನ್ನು ಭಾರತಕ್ಕೆ ಕರೆತಂದದ್ದು ಇತಿಹಾಸ. ೧೫ ರಿಂದ ೧೬ನೇ ಶತಮಾನದ ಅವಧಿಯಲ್ಲಿ ಅರಬರು ಮತ್ತು ಪೋರ್ಚುಗೀಸರು ಆಫ್ರಿಕಾ ಜನರನ್ನು(ಕರಿಯರನ್ನು) ಭಾರತಕ್ಕೆ ತಂದು ಗುಜರಾತ್, ಮಹಾರಾಷ್ಟ್ರ, ಗೋವಾದಲ್ಲಿ ತಮ್ಮ ಗುಲಾಮರನ್ನಾಗಿ ಇಟ್ಟುಕೊಂಡಿದ್ದರು ಎಂದು ಇತಿಹಾಸ ಹೇಳುತ್ತದೆ. ಬಲಾಢ್ಯವಾಗಿರುವ ಸಿದ್ದಿ ಜನರ ಕೆಲಸ ಮಾಡುವ ಸಾಮರ್ಥ್ಯ ಅರಬರು, ಪೋರ್ಚುಗೀಸರನ್ನು ಆಕರ್ಷಿಸಿತ್ತು.
ಇಂದು ಕರ್ನಾಟಕ, ಗುಜರಾತ್, ಗೋವಾ, ಡಯೂ ಮತ್ತು ಆಂಧ್ರದಲ್ಲೂ ಸಿದ್ದಿ ಜನರಿದ್ದಾರೆ. ಮಹಾರಾಷ್ಟ್ರದಲ್ಲಿ ಇವರನ್ನು ಹಾಬ್ಸಿಸ್, ಗೋವಾದಲ್ಲಿ ಕಾಪಿರ್‍ಸ್ ಎಂದು ಈ ಜನರನ್ನು ಕರೆಯುತ್ತಾರೆ. ಕರ್ನಾಟಕದಲ್ಲಿ ಸಿದ್ದಿಗಳು ವಾಸವಾಗಿರುವುದು ಉತ್ತರ ಕನ್ನಡ ಜಿಲ್ಲೆಯಲ್ಲಿ ಮಾತ್ರ. ೨೦೦೧ರ ಗಣತಿಯ ಪ್ರಕಾರ ಒಟ್ಟು ೧೪,೦೭೨ ಸಿದ್ದಿ ಜನರಿದ್ದಾರೆ. ಇದು ತ್ರಿ ಧರ್ಮೀಯ ಸಿದ್ದಿ ಜನಸಂಖ್ಯೆ. ಇವರಲ್ಲಿ ಶೇ.೫೦ರಷ್ಟು ಸಿದ್ದಿಯರು ಹಿಂದೂ ಧರ್ಮೀಯರು ಎಂಬುದು ಒಂದು ಅಂದಾಜು. ಮುಂಡಗೋಡು ಮತ್ತು ಹಳಿಯಾಳ ತಾಲೂಕಿನಲ್ಲಿ ಕ್ರಿಶ್ಚಿಯನ್ ಸಿದ್ದಿಯರು ಹೆಚ್ಚಿದ್ದರೆ, ಅಂಕೋಲಾ, ಯಲ್ಲಾಪುರ ಮತ್ತು ಶಿರಸಿ ತಾಲೂಕಿನಲ್ಲಿ ಹಿಂದೂ ಸಿದ್ದಿ ಜನ ಹೆಚ್ಚಿನ ಪ್ರಮಾಣದಲ್ಲಿದ್ದಾರೆ.
ಭಾರತಕ್ಕೆ ಬಂದು ಶತ- ಶತಮಾನಗಳು ಗತಿಸಿದ ಮೇಲೆ (ನಿಗ್ರೋ ಜನರು) ಸಿದ್ದಿಯರು ಗುಲಾಮಗಿರಿಯ ದಾಸ್ಯದಿಂದ ಮುಕ್ತರಾದರು. ಕಾಡು ಸೇರಿ ಸ್ವತಂತ್ರ ಜೀವನ ಆರಂಭಿಸಿದರು. ಕೂಲಿ ಮಾಡಿ ಕಾಳು ಗಿಟ್ಟಿಸಿದರು. ಅಲ್ಪ ಸ್ವಲ್ಪ ಕೃಷಿಯನ್ನೂ ಕಲಿತು, ಕೈಗೊಂಡರು. ಇಂದು ಭಾಗಶಃ ಸಿದ್ದಿಗಳು ಕೃಷಿಕರು ಅಥವಾ ಕೃಷಿ ಕಾರ್ಮಿಕರು. ಹಿಂದೂ ಮತ್ತು ಕ್ರಿಶ್ಚಿಯನ್ ಸಿದ್ದಿಗಳು ಕನ್ನಡ, ಕೊಂಕಣಿ ಮಾತನಾಡುತ್ತಾರೆ. ಮುಸ್ಲಿಂ ಸಿದ್ದಿಗಳು ಉರ್ದು ಮಾತನಾಡುತ್ತಾರೆ.
ಮದುವೆಯ ಬಂಧನ:ಸಾಮಾನ್ಯವಾಗಿ ಜನಾಂಗ, ಜಾತಿಯ ಜನರ ನಡುವೆ ಮದುವೆ ಸಂಬಂಧ ಏರ್ಪಡುತ್ತದೆ. ಸಿದ್ದಿಗರಲ್ಲಿ ಬೇರೆಯದೇ ಸ್ಥಿತಿ. ಒಂದೇ ಬುಡಕಟ್ಟು ಜನಾಂಗವಾಗಿದ್ದರೂ ಇಲ್ಲಿ ಧರ್ಮ ಬೇರೆ ಬೇರೆ. ದಶಕಗಳ ಹಿಂದೆ ಮೂರು ಧರ್ಮೀಯ ಸಿದ್ದಿಯರಲ್ಲೂ ಪರಸ್ಪರ ಮದುವೆ ನಡೆಯುತ್ತಿತ್ತು. ಈಗ ಮುಸ್ಲಿಂ ಸಿದ್ದಿಯರು ಹಿಂದೂ, ಕ್ರಿಶ್ಚಿಯನ್ ಸಿದ್ದಿಯರೊಂದಿಗೆ ಮದುವೆ ಸಂಬಂಧ ಮಾಡುವುದಿಲ್ಲ. ಕ್ರಿಶ್ಚಿಯನ್ ಮತ್ತು ಹಿಂದೂ ಸಿದ್ದಿಯರಲ್ಲಿ ಮದುವೆ ಸಂಬಂಧ ಇತ್ತೀಚಿನ ದಶಕದಲ್ಲಿ ನಡೆಯುತ್ತಿದೆ. ಈ ಮೊದಲು ಹಿಂದೂ- ಕ್ರಿಶ್ಚಿಯನ್ ಸಿದ್ದಿಯರಲ್ಲಿ ಮದುವೆ ಆದಾಗ ಗಂಡಿನ ಮನೆಯ ಧರ್ಮಕ್ಕೆ ಹೆಣ್ಣು ಸೇರುವುದು ಸಾಮಾನ್ಯವಾಗಿತ್ತು. ಆದರೆ ಈಗ ಗಂಡಾಗಲಿ, ಹೆಣ್ಣಾಗಲಿ ಹಿಂದೂ- ಕ್ರಿಶ್ಚಿಯನ್ ಮದುವೆಯಲ್ಲಿ ಇಬ್ಬರೂ ಕ್ರಿಶ್ಚಿಯನ್ ಧರ್ಮವನ್ನೇ ಸ್ವೀಕರಿಸುವುದು.
ಸಿದ್ದಿಗಳೂ ಮೂರು ಧರ್ಮದಲ್ಲಿದ್ದರೂ ಆಯಾ ಧರ್ಮದ ಜನ ಸಿದ್ದಿಯರ ಜತೆ ವೈವಾಹಿಕ ಸಂಬಂಧ ಬೆಳೆಸುವುದಿಲ್ಲ. ಹಿಂದೂ, ಮುಸ್ಲಿಂ, ಕ್ರಿಶ್ಟಿಯನ್ ಸಿದ್ದಿಗಳಲ್ಲೇ ವಿವಾಹ ಸಂಬಂಧ ನಡೆಯುವುದು. ಇತರರ ಸಿದ್ದಿಯರ ಜತೆ ವೈವಾಹಿಕ ಸಂಬಂಧ ಕೈಗೊಳ್ಳದೇ ಇರುವುದಕ್ಕೆ ದೈಹಿಕ ಗುಣಲಕ್ಷಣ ಪ್ರಮುಖ ಕಾರಣ ಎಂಬ ಅನಿಸಿಕೆ ಹಂಪಿ ಕನ್ನಡ ವಿಶ್ವ ವಿದ್ಯಾಲಯದ ಬುಡಕಟ್ಟು ಅಧ್ಯಯನ ಪೀಠದ ಹಿ.ಚಿ.ಬೋರಲಿಂಗಯ್ಯ ಅವರದು.
ಕ್ರಿಶ್ಚಿಯನ್ ಸಿದ್ದಿಗಳೊಂದಿಗೆ ಕ್ರಿಶ್ಚಿಯನ್ ಧರ್ಮದ ಇತರರು ವೈವಾಹಿಕ ಸಂಬಂಧ ನಡೆಸುವುದಿಲ್ಲ. ಹಿಂದೂ, ಮುಸ್ಲಿಂ ಸಿದ್ದಿಗಳಲ್ಲೂ ಇದೇ ಸ್ಥಿತಿ. ತ್ರಿ ಧರ್ಮದ ಸಿದ್ಧಿಗಳಲ್ಲೇ ವೈವಾಹಿಕ ಸಂಬಂಧ ಏರ್ಪಡುವುದು ಎನ್ನುತ್ತಾರೆ ಲಾರೆನ್ಸ್ ಸಿದ್ದಿ.
ತ್ರಿ ಧರ್ಮೀಯರಾದದ್ದು ಹೇಗೆ?: ಸಿದ್ದಿಗಳು ಮೂರು ಧರ್ಮ ಸ್ವೀಕರಿಸಿದ್ದು ನಿಖರವಾಗಿ, ದಾಖಲೆಯ ರೂಪದಲ್ಲಿಲ್ಲವಾದರೂ, ಅಧ್ಯಯನ ಆಧಾರದ ಮೇಲೆ ವಿವಿಧ ಅಭಿಪ್ರಾಯಗಳಿವೆ.
ಯುರೋಪಿಯನ್ನರ ಜತೆ ಭಾರತಕ್ಕೆ ಬಂದು, ಅವರ ಅಧೀನದಲ್ಲಿದ್ದರಿಂದ ಕ್ರಿಶ್ಚಿಯನ್ನರಾಗುವುದು ಅನಿವಾರ್ಯವಾಯಿತು. ಕಾಲಾನಂತರ ಕಾಡಿಗೆ ಬಂದ ಮೇಲೆ ಕೆಲವು ಹಿಂದೂಗಳ ಜತೆ ಒಡನಾಡಿಯಾಗಿ ಹಿಂದೂ ಧರ್ಮೀಯರಾದರು. ಮುಸ್ಲಿಂ ದೊರೆಗಳು- ಬಿಜಾಪುರ ಸುಲ್ತಾನರ ಅವಧಿಯಲ್ಲಿ ಸಿದ್ದಿಯರನ್ನು ಸೈನ್ಯಕ್ಕೆ ಸೇರಿಕೊಂಡ ಉಲ್ಲೇಖಗಳಿವೆ. ಹೀಗೆ ಕೆಲವು ಸಿದ್ದಿಯರು ಮುಸ್ಲಿಂ ಧರ್ಮಕ್ಕೆ ಹೋದರು. ಇದ್ಯಾವುದೂ ಅವರ ಮೂಲ ಧರ್ಮವಲ್ಲ ಎನ್ನುತ್ತಾರೆ ಹಿ.ಚಿ.ಬೋರಲಿಂಗಯ್ಯ ಅವರು.
ಸಮಾಜದಲ್ಲಿ ಸಿದ್ದಿ ಜನರು ಎಂದರೆ ನಿಗ್ರೋಗಳು, ಆಫ್ರಿಕಾದವರು ಎಂದು ನೋಡುತ್ತಾರೆ. ಆಫ್ರಿಕಾದವರಾದ್ದರಿಂದ ಕ್ರಿಶ್ಚಿಯನ್ನರು ಎಂದು ತಿಳಿಯುತ್ತಾರೆ. ಆಫ್ರಿಕಾ ಮೂಲದವರೆಲ್ಲ ಕ್ರಿಶ್ಚಿಯನ್ನರಾಗಲು ಸಾಧ್ಯವಿಲ್ಲ. ಈ ಸಂಗತಿಯನ್ನು ಕೆಲವರು ಅಪಪ್ರಚಾರ, ದುರ್ಲಾಭಕ್ಕೆ ಬಳಸಿಕೊಳ್ಳುತ್ತಾರೆ ಎಂಬ ಅಸಮಾಧಾನ ಮಂಚಿಕೇರಿಯ ಶಾಂತಾರಾಮ ಸಿದ್ದಿ ಅವರದ್ದು.
ಧರ್ಮದ ಮೂಲ ಗೊತ್ತಿಲ್ಲದೇ ಇರುವುದರಿಂದ ಆಯಾ ಪ್ರದೇಶಕ್ಕೆ ಅನುಗುಣವಾಗಿ ಧರ್ಮ ಸ್ವೀಕಾರವಾಗಿರಬೇಕು ಎನ್ನುತ್ತಾರೆ ಮಂಚಿಕೇರಿ ಬಳಿಯ ಅಣಲೆಸರದ ಪರಶುರಾಮ ಸಿದ್ದಿ.
೧೬೯೦ರ ಸಮಯದಲ್ಲಿ ಗೋವಾದಿಂದ ಕರ್ನಾಟಕಕ್ಕೆ ಓಡಿ ಬಂದ ಸಿದ್ದಿಗಳು ಕಾಡು ಸೇರಿ ಜೀವನ ನಡೆಸಲು ಆರಂಭಿಸಿರಬಹುದು. ಆವಾಗ ಯಾವ ಧರ್ಮದ ಜನರ ಒಡನಾಟ ಸಿದ್ದಿ ಜನರಿಗೆ ಸಿಕ್ಕಿತೋ ಆ ಧರ್ಮ ಸ್ವೀಕರಿಸಿದರು ಎನ್ನುತ್ತಾರೆ ವನವಾಸಿ ಕಲ್ಯಾಣ ಸಂಸ್ಥೆಯ ಕೃಷ್ಣಮೂರ್ತಿ.
ಧಾರ್ಮಿಕತೆ : ತ್ರಿ ಧರ್ಮದ ಸಿದ್ದಿಗಳೂ ಕುಟುಂಬದ ಹಿರಿಯರನ್ನು ಪೂಜಿಸುತ್ತಾರೆ. ಮುಸ್ಲಿಂ ಸಿದ್ದಿಗಳು ಗ್ರಹಣದ ನಂತರ ಮನೆಯಲ್ಲಿ ಇಟ್ಟ ತೆಂಗಿನಕಾಯಿಯನ್ನು ಬದಲಾಯಿಸುತ್ತಾರೆ. ಕ್ರಿಶ್ಚಿಯನ್‌ರಲ್ಲಿ ಎಲ್ಲರೂ ತೆಂಗಿನಕಾಯಿ ಪೂಜಿಸುವುದಿಲ್ಲ. ಹಿಂದೂ ಸಿದ್ದಿಗಳು ತೆಂಗಿನಕಾಯಿ ಪೂಜಿಸುತ್ತಾರೆ. ಕ್ರಿಶ್ಚಿಯನ್ ಸಿದ್ದಿಗಳು ಮದುವೆಗೆ ಮುನ್ನ ವಧು- ವರ ಚರ್ಚ್‌ನಲ್ಲಿ ಪಾದ್ರಿ ಬಳಿ ತರಬೇತಿ ಪಡೆಯುತ್ತಾರೆ. ಹಿಂದೂ ಸಿದ್ದಿಗಳ ಮದುವೆಯಲ್ಲಿ ಬ್ರಾಹ್ಮಣರ ಅನುಕರಣೆ ಇದೆ. ಮುಸ್ಲಿಂ ಸಿದ್ದಿಗಳ ಮದುವೆಗೆ ಮುಲ್ಲಾಗಳು ಬರುತ್ತಾರೆ.
ಜಾನಪದ ನಂಟು: ಡಮಾಮಿ ಮತ್ತು ಪುಗಡಿ ಹಿಂದೂ ಸಿದ್ದಿ ಜನರ ವಿಶೇಷ ಜಾನಪದ ವಾದ್ಯಗಳು. ಹಬ್ಬದಲ್ಲಿ ಈ ವಾದ್ಯದೊಂದಿಗೆ ಜಾನಪದ ನೃತ್ಯ ಮಾಡುತ್ತಾರೆ. ಮುಸ್ಲಿಂ ಸಿದ್ದಿಗಳು ಢೋಲಕಿ ಬಾರಿಸುತ್ತಾರೆ. ಅಲಗುಂ ಕುಣಿತ ಮಾಡುತ್ತಾರೆ. ಕ್ರಿಶ್ಚಿಯನ್ ಸಿದ್ದಿಗಳು ಜಾನಪದ ವಾದ್ಯ, ಕುಣಿತದಿಂದ ದೂರ. ಬುಡಕಟ್ಟು ಜನಾಂಗದವರಿಗೆ ಅವರದೇ ಆದ ಜನಪದ ಆಚರಣೆ ಇರುತ್ತವೆ. ಸಿದ್ದಿಗಳು ಹಿಂದಿನ ಕ್ರೌರ್‍ಯದ ಅವಧಿಯಲ್ಲಿ ಎಲ್ಲವನ್ನೂ ಮರೆತಿರಬೇಕು ಎನ್ನುತ್ತಾರೆ ಇತಿಹಾಸಕಾರರು.
ಅಡ್ಡ ಹೆಸರು : ಸಿದ್ದಿ ಜನರ ತ್ರಿ ಧರ್ಮವನ್ನು ಲೆಕ್ಕಿಸದೆ ಈ ಜನಾಂಗವನ್ನು ೧೯೮೬ರಲ್ಲಿ ಹಿಂದುಳಿದ ಪಂಗಡಕ್ಕೆ(ಬಿ ಟಿ) ಸೇರಿಸಲಾಗಿತ್ತು. ಹಸನ್ ಹುಸೇನ್ ಸಿದ್ದಿ, ನಾಗ್ಯಾ ಸಿದ್ದಿ, ಅಂಥೋನಿ ಸಿದ್ದಿ. ಈ ಮೂರು ಹೆಸರು ಒಂದೊಂದು ಧರ್ಮಕ್ಕೆ ಸೇರಿದ್ದು. ಎಲ್ಲರದ್ದೂ ಮೂಲತಃ ಸಿದ್ದಿ ಜನಾಂಗವೇ. ಒಂದೇ ಜನಾಂಗದವರಾಗಿದ್ದರೂ ಅವರ ಧರ್ಮ ಮಾತ್ರ ಬೇರೆ ಬೇರೆ. ಧರ್ಮ ಬದಲಾದಾಗ ಕೆಲವರು ತಮ್ಮ ಹೆಸರಿನೊಂದಿಗೆ ಇದ್ದ ‘ಸಿದ್ದಿ’ ಅಡ್ಡ ಹೆಸರು ಕೈಬಿಟ್ಟರು. ೨೦೦೩ರಲ್ಲಿ ಸಿದ್ದಿ ಜನಾಂಗವನ್ನು ಪರಿಶಿಷ್ಟ ವರ್ಗಕ್ಕೆ ಸೇರಿಸಲಾಯಿತು. ಇದರಂತೆ ಸಿದ್ದಿ ಎಂಬ ಹೆಸರು ಇರುವವರಿಗೆ ಮಾತ್ರ ಪರಿಶಿಷ್ಟ ವರ್ಗಕ್ಕೆ ದೊರೆಯುವ ಸೌಲಭ್ಯ ಸಿಗುವುದು. ಸಿದ್ದಿ ಮೂಲದ ಕ್ರಿಶ್ಚಿಯನ್ ಮತ್ತು ಮುಸ್ಲಿಂ ಧರ್ಮದಲ್ಲಿರುವವರು ತಮ್ಮ ಹೆಸರಿನೊಂದಿಗೆ ‘ಸಿದ್ದಿ’ಯನ್ನು ಕೈಬಿಟ್ಟಿದ್ದರು. ಆದರೆ ಎಸ್‌ಟಿ ಜನರ ಸೌಲಭ್ಯ ಪಡೆಯಲು ಪುನಃ ಕೆಲವರು ಸಿದ್ದಿ ಅಡ್ಡ ಹೆಸರನ್ನು ಸೇರಿಸಿಕೊಂಡರು.

ಹುತ್ತದಲ್ಲಿ ಅಣಬೆ ನೋಡಿದ್ದೀರಾ?

2009-07-18T05:28:00.000-07:00

ಹುತ್ತದಲ್ಲಿ ಅಣಬೆ ನೋಡಿದ್ದೀರಾ? ಸಿನೇಮಾಗಳಲ್ಲಿ ಹುತ್ತದಿಂದ ಹಾವು ಬರುವುದು ಗೊತ್ತು , ಇನ್ನು ಹುತ್ತದಲ್ಲಿ ಗೆದ್ದಲು ನೋಡಿದ್ದೇವೆ. ಆದರೆ ಅಣಬೆ?

ಹುತ್ತದ ಅಣಬೆ ರುಚಿಗೆ ನಾಲಿಗೆ ಎಷ್ಟು ಮರುಳಾಗಿದೆ ಎಂದರೆ, ಧಾರವಾಡದ ಕೃಷಿ ವಿಶ್ವ ವಿದ್ಯಾಲಯ ಸೇರಿದಂತೆ ದೇಶ, ವಿದೇಶದ ಹಲವು ವಿಶ್ವ ವಿದ್ಯಾಲಯಗಳ ವಿಜ್ಞಾನಿಗಳು ಹುತ್ತದ ಅಣಬೆ ಜೀನ್‌ಗಳನ್ನು ಪ್ರತ್ಯೇಕಿಸಿ ಲ್ಯಾಬ್‌ನಲ್ಲಿ ಬೆಳೆಯಲು ಪ್ರಯತ್ನಿಸಿದ್ದಾರೆ. ಆದರೆ ಹುತ್ತದ ಅಣಬೆ ಮಾತ್ರ ಲ್ಯಾಬ್‌ನಲ್ಲಿ ಹುಟ್ಟಲಿಲ್ಲ. ಒಮ್ಮೆ ಈ ಹುತ್ತದ ಅಣಬೆಯ ಜೀನ್‌ಗಳನ್ನು ಅಭಿವೃದ್ಧಿಪಡಿಸಿ ಲ್ಯಾಬ್‌ನಲ್ಲಿ ಬೆಳೆಯಲು ಸಾಧ್ಯವಾಗಿದ್ದರೆ ಅಣಬೆಯ ರುಚಿ ತಿನ್ನುವವರಿಗೆಲ್ಲರಿಗೂ ಸಿಗುತ್ತಿತ್ತು.ಹುತ್ತದ ಅಣಬೆ ಹುಟ್ಟು ಕುತೂಹಲ. ಗೆದ್ದಲುಗಳ ಹುತ್ತದಲ್ಲಿ (ಫಂಗಲ್ ಗಾರ್ಡ್‌ನ್) ಶಿಲೀಂದ್ರ ತೋಟ ಇರುತ್ತವೆ. ಇದೇ ಫಂಗಲ್ ಗಾರ್ಡ್‌ನ್ ಹುತ್ತದ ಅಣಬೆಯ ಜನ್ಮಕ್ಕೆ ಕಾರಣೀಭೂತ. ಟರ್ಮೈಟೋಮೈಸಿಸ್ ಜಾತಿಯ ಶಿಲೀಂದ್ರ ಹುತ್ತದ ಅಣಬೆಯ ಜನ್ಮಕ್ಕೆ ಮೂಲ. ಇವು ಮಣ್ಣಿನಲ್ಲಿ ಬೆರೆತು, ನಿರ್ದಿಷ್ಟ ಹವಾಗುಣದಲ್ಲಿ ಅಣಬೆಯಾಗಿ ಹುಟ್ಟುತ್ತವೆ. ಮಳೆಗಾಲದಲ್ಲಿ ಮಾತ್ರ ಹುತ್ತದ ಅಣಬೆ ಏಳುವುದು. ಸಾಮಾನ್ಯವಾಗಿ ಗುಂಪು ಗುಂಪಿನಲ್ಲಿ ೧೦ರಿಂದ ನೂರಾರು ಅಣಬೆಗಳು ಒಮ್ಮೆಲೇ ಜನಿಸುತ್ತವೆ. ಹುಟ್ಟಿದ ಒಂದರಿಂದ ಎರಡು ದಿನದ ಅವಧಿಯಲ್ಲೇ ಇವು ಕೊಳೆಯುತ್ತವೆ. ಆಗತಾನೇ ಹುಟ್ಟಿದ ಅಣಬೆಯ ಮೊಗ್ಗು, (ಅಂದರೆ, ಇನ್ನೂ ಅರಳದ) ಸಿಕ್ಕರೆ ಬಾಜಿ ಮಾಡಲು ತುಂಬಾ ಯೋಗ್ಯವಾದದ್ದು.
ಬೆಳಗಾವಿ, ಕುಮಟಾ, ಶಿರಸಿ, ಹಳಿಯಾಳ, ದಾಂಡೇಲಿ ಸೇರಿದಂತೆ ವಿವಿಧೆಡೆಮಳೆಗಾಲದಲ್ಲಿ ಸೀಸನಲ್ ಅಣಬೆ ಮಾರುಕಟ್ಟಯೇ ಇರುತ್ತದೆ. ಜನ ಈ ಅಣಬೆಯನ್ನು ಮುಗಿಬಿದ್ದು ಕೊಳ್ಳುವುದೂ ಇದೆ.
ಪಕ್ಕದ ಗೋವಾದಲ್ಲಿ ೧೯೮೪ರಲ್ಲೇ ವಾರ್ಷಿಕ ೫ ಲಕ್ಷ (ನೂರು ಅಣಬೆಗೆ ೫ ರುರಾಯಿ) ಮೌಲ್ಯದ ಅಣಬೆ ಮಾರಾಟವಾಗುತ್ತಿತ್ತು ಎಂಬ ಮಾಹಿತಿ ಇಂಟನ್‌ನೆಟ್‌ನಲ್ಲಿ ಲಭ್ಯವಿದೆ. ೨೦೦೪ರಲ್ಲಿ ೪೦ರಿಂದ ೫೦ ಅಣಬೆಗೆ ೧೫೦ ರು. ಬೆಲೆ ಇತ್ತು ಎಂದೂ ಇಂಟರ್‌ನೆಟ್ ಮಾಹಿತಿಗಳು ಹೇಳುತ್ತವೆ. ಅಲ್ಲಿ ಹುತ್ತದ ಅಣಬೆ ಮಾರಾಟ, ದಂಧೆ ಜೋರಾಗಿಯೇ ನಡೆದಿತ್ತು. ೧೯೯೩ರಲ್ಲಿ ಅಲ್ಲಿನ ಸರ್ಕಾರ ವನ್ಯ ಜೀವಿ ಧಾಮ ಪ್ರದೇಶದಲ್ಲಿ ಹುತ್ತದ ಅಣಬೆ ಕೀಳುವುದನ್ನು ನಿಷೇಧಿಸಿತ್ತು. ಬಳಿಕ ಈ ಕುರಿತು ಸಾಕಷ್ಟು ವಿವಾದವೂ ಆಗಿತ್ತು.
ಮೊದಲು ಅಣಬೆ ಹುಡುಕಲು ಕಾಡು, ಬೆಟ್ಟಕ್ಕೆ ಹೋದವರು ಬರಿ ಕೈಯಲ್ಲಿ ವಾಪಸ್ ಆಗುತ್ತಿರಲಿಲ್ಲವಂತೆ. ಕಂಬಳಿ, ಹಾಳೆ ತುಂಬಾ ಅಣಬೆ ತುಂಬಿಕೊಂಡೇ ಮನೆಗೆ ಬರುತ್ತಿದ್ದರು. ಗಣೇಶ ಚತುರ್ಥಿ ಆಸು ಪಾಸು ಹುತ್ತದ ಅಣಬೆ ಏಳುವುದು ಹೆಚ್ಚು. ಅಮಾವಾಸ್ಯೆ, ಹುಣ್ಣಿಮೆಯ ಹಿಂದು ಮುಂದಿನ ದಿನಗಳಲ್ಲೂ ಏಳುವುದಿದೆ. ಈ ಅವಧಿಯಲ್ಲಿ ಗಾಳಿ ಮಳೆ ಆದರೆ ಖಂಡಿತಾ ಹುತ್ತದ ಅಣಬೆ ತಲೆ ಎತ್ತುತ್ತವೆ ಎಂಬುದು ಅಣಬೆ ಕೀಳುವವರ ಸಾಮಾನ್ಯ ಜ್ಞಾನ.
ಗಣೇಶ ಚತುರ್ಥಿ ವೇಳೆಗೆ ಊರಿಗೆ ಹೋದಾಗ ಹುತ್ತದ ಅಣಬೆ ನೋಡುವ ಕುತೂಹಲದಿಂದ, ಮಧುನ ಜತೆಗೆ ನಾನು ಹೊಸಬೆಟ್ಟ ಸೇರಿದಂತೆ, ಸುತ್ತಲಿನ ಅರಣ್ಯಕ್ಕೆ ಹೋಗುತ್ತಿದ್ದೆ. ಹೀಗೆ ಹುತ್ತದ ಅಣಬೆ ನೋಡಲು ಹೋದಾಗ ೩ ಹುತ್ತದಲ್ಲಿ ಅಣಬೆ ಅರಳಿತ್ತು.

ಅಂಚೆ ಚೀಟಿಯಲ್ಲಿ ಕೃಷಿಲೋಕ

2009-05-06T08:19:00.000-07:00

ಅಂಚೆ ಚೀಟಿಯಲ್ಲಿ ದೇಶದ ಕೃಷಿಯ ಆಗುಹೋಗುಗಳ ಸ್ಥೂಲನೋಟ ಸಾಧ್ಯ. ಇಲ್ಲಿದೆ ಅಂತಹ ಕಿರು ಪ್ರಯತ್ನ.

ಮೊದಲ ಕೃಷಿ ಅಂಚೆ ಚೀಟಿ: ಸ್ವತಂತ್ರ್ಯಾನಂತರ ೧೯೫೦ರಲ್ಲಿ ದೇಶದಲ್ಲಿ ಮೊದಲ ಬಾರಿ ಕೃಷಿಗೆ ಸಂಬಂಧಿಸಿದ ಸ್ಟ್ಯಾಂಪ್ ಬಿಡುಗಡೆಯಾಯಿತು. ತೆನೆ, ನೇಗಿಲು ಮತ್ತು ನೀರೀಕ್ಷೆಯಿಂದ ಮೇಲೆ ನೋಡುತ್ತಿರುವ ಪುರುಷ- ಸ್ತ್ರೀ ಚಿತ್ರ ಇದರಲ್ಲಿದೆ. ಈ ಅಂಚೆ ಚೀಟಿ ಮೌಲ್ಯ ೪ ಅಣೆ. ನಮ್ಮದು ಕೃಷಿ ಪ್ರಧಾನ ದೇಶ ಹಾಗೂ ಕೃಷಿಯಲ್ಲಿ ಇನ್ನೂ ಸಾಧನೆ ಮಾಡಬೇಕು ಎಂಬ ಸಂದೇಶ ಈ ಅಂಚೆ ಚೀಟಿಯದ್ದು. ಜನವರಿ ೨೬ ೧೯೫೦ರಲ್ಲಿ ಬಿಡುಗಡೆಯಾಯಿತು.

ದೆಹಲಿಯಲ್ಲಿ ಮೊದಲ ವಿಶ್ವ ಕೃಷಿ ಸಮ್ಮೇಳನ ೩೦ ಡಿಸೆಂಬರ್ ೧೯೫೮ರಲ್ಲಿ ನಡೆಯಿತು. ದೇಶದ ಕೃಷಿ ಜೀವನ ಈ ಸಮ್ಮೇಳನದಲ್ಲಿ ಬಿಂಬಿತವಾಗಿತ್ತು. ಈ ಸಮ್ಮೇಳನ ಸ್ಮರಣಾರ್ಥ ಜೋಡಿ ಎತ್ತಿಗೆ ಕಟ್ಟಿದ ನೇಗಿಲಿನಿಂದ ಊಳುತ್ತಿರುವ ರೈತನ ಚಿತ್ರದ ಅಂಚೆ ಚೀಟಿ ಬಿಡುಗಡೆ ಮಾಡಲಾಗಿದೆ. ಇದರ ಮೌಲ್ಯ ೧೫ ಪೈಸೆ.

ಜೈ ಕಿಸಾನ್: ಲಾಲ್‌ಬಹಾದೂರ್ ಶಾಸ್ತ್ರಿ ಅವರ ಜೈ ಕಿಸಾನ್, ಜೈ ಜವಾನ್ ಘೋಷಣೆಯ ಮೇಲೆ ಅಂಚೆ ಚೀಟಿ ತರಲಾಗಿದೆ. ಶಾಸ್ತ್ರಿ ಅವರ ಮೊದಲ ಪುಣ್ಯತಿಥಿಯಂದು ಜೈ ಕಿಸಾನ್ ಅಂಚೆ ಚೀಟಿ ಬಿಡುಗಡೆಯಾಯಿತು. ೧೭ ಜನವರಿ ೧೯೬೭ರಲ್ಲಿ ಬಿಡುಗಡೆಯಾದ ಈ ಅಂಚೆ ಚೀಟಿ ಮೌಲ್ಯ ೧೫ ಪೈಸೆ. ಪೈರು ಕೊಯ್ಯುತ್ತಿರುವ ರೈತರ ಚಿತ್ರ ಇದರಲ್ಲಿದೆ.
೪ನೇ ಪಂಚ ವಾರ್ಷಿಕ ಯೋಜನೆಯಲ್ಲಿ ಕೃಷಿಗೆ ಆಧ್ಯತೆ ನೀಡಲಾಗಿತ್ತು. ಆಹಾರ ಉತ್ಪಾದನೆಯಲ್ಲಿ ಸ್ವಾವಲಂಬನೆ ಸಾಧಿಸುವ ಉದ್ದೇಶವನ್ನು ಅಂಚೆ ಚೀಟಿ ಬಿಂಬಿಸುತ್ತದೆ. ಅಂದು ಇದ್ದ ೧೨೦ ಮಿಲಿಯನ್ ಟನ್ ನಷ್ಟು ಆಹಾರ ಉತ್ಪಾದನೆಯನ್ನು ೧೯೭೦ -೭೧ರ ವೇಳೆಯಲ್ಲಿ ಹೆಚ್ಚುವರಿಯಾಗಿ ೩೦ ಮಿಲಿಯನ್ ಟನ್‌ಗೆ ಹೆಚ್ಚಿಸುವ ಗುರಿ ಹೊಂದಲಾಗಿತ್ತು ಎಂದು ಜೈಕಿಸಾನ್ ಅಂಚೆ ಚೀಟಿಯ ಲೀಪ್‌ಲೆಟ್‌ನಲ್ಲಿ ಹೇಳಲಾಗಿದೆ.

೧೯೫೧ರಿಂದ ೧೯೬೮ರ ಅವಧಿಯಲ್ಲಿ ದೇಶದಲ್ಲಾದ ಗೋಧಿ ಕ್ರಾಂತಿ ನಿಮಿತ್ತ ೧೯೬೮ ಜುಲೈ ೧೭ರಂದು ಅಂಚೆ ಚೀಟಿ ಬಿಡುಗಡೆ ಮಾಡಲಾಗಿದೆ. ೨೦ ಪೈಸೆ ಇದರ ಬೆಲೆ.

ಆಧುನಿಕ ನೇಗಿಲು :ದೇಶಕ್ಕೆ ಆಧುನಿಕ ಕಬ್ಬಿಣದ ನೇಗಿಲು ಪರಿಚಯಿಸಿದವರು ಲಕ್ಷ್ಮಣರಾವ್ ಕಿರ್ಲೋಸ್ಕರ್. ಅವರು ಕರ್ನಾಟಕದ ಬೆಳಗಾವಿಯವರು. ಕಿರ್ಲೋಸ್ಕರ್ ಗ್ರುಪ್‌ನ ಮೊದಲ ಉತ್ಪನ್ನ ಮೈಕಾನೈಸ್ಡ್ ನೇಗಿಲು. ಲಕ್ಷ್ಮಣರಾವ್ ಅವರ ಜನ್ಮ ಶತಾಬ್ದಿ ನಿಮಿತ್ತ ೨೦ ಜೂನ್ ೧೯೬೯ರಲ್ಲಿ ಲಕ್ಷ್ಮಣರಾವ್ ಕಿರ್ಲೋಸ್ಕರ್ ಫೋಟೋ ಮತ್ತು ಅವರು ಸಂಶೋಧಿಸಿದ ನೇಗಿಲಿನ ರೇಖಾ ಚಿತ್ರದ ಅಂಚೆ ಚೀಟಿ ಮುದ್ರಿತವಾಗಿದೆ. ಮೌಲ್ಯ ೨೦ ಪೈಸೆ.

ನೀರಾವರಿ ಕಮಿಷನ್‌ನ ೨೫ನೇ ವಾರ್ಷಿಕ ದಿನ ಅಂಗವಾಗಿ ೧೯೭೫ರಲ್ಲಿ ಅಂಚೆ ಚೀಟಿ ಮುದ್ರಿಸಲಾಗಿದೆ. ಮೌಲ್ಯ ೨೫ ಪೈಸೆ.

೧೯೭೬ ಡಿಸೆಂಬರ್ ೨೭ರಂದು ಹೈಬ್ರಿಡ್ ತೆಂಗಿನ ತಳಿಯ ಅಂಚೆ ಚೀಟಿ ಬಿಡುಗಡೆಯಾಗಿದೆ. ಡೈಮಂಡ್ ಜುಬ್ಲಿ ಆಫ್ ಕೋಕೋನಟ್ ರಿಸರ್ಚ್‌ನ ಸ್ಮರಣಾರ್ಥ ಇದನ್ನು ಮುದ್ರಿಸಲಾಗಿದೆ. ಬೆಲೆ ೨೫ ಪೈಸೆ.

೧೯೭೭ರಲ್ಲಿ ನವ ದೆಹಲಿಯ ಪ್ರಗತಿ ಮೈದಾನದಲ್ಲಿ ಕೃಷಿ ವಸ್ತು ಪ್ರದರ್ಶನ ನಡೆದಿತ್ತು. ಇದರ ಅಂಗವಾಗಿ ೧೩ ನವೆಂಬರ್ ೧೯೭೭ರಲ್ಲಿ ಗೋಧಿಯ ತೆನೆಯ ಚಿತ್ರವಿರುವ ಅಂಚೆ ಚೀಟಿ ಬಿಡುಗಡೆಯಾಗಿದೆ. ಪ್ರದರ್ಶನದಲ್ಲಿ ಅಪ್ಘಾನಿಸ್ಥಾನ, ಹಂಗೇರಿ, ಜಪಾನ್, ಯುಎಸ್‌ಎಸ್‌ಆರ್ ಇನ್ನಿತರ ದೇಶಗಳು ಪಾಲ್ಗೊಂಡಿದ್ದವು. ಅಂಚೆ ಚೀಟಿ ಮೌಲ್ಯ ೨೫ ಪೈಸೆ.

೫ನೇ ಅಂತಾರಾಷ್ಟ್ರೀಯ ಗೋಧಿ ತಳಿ ವಿಚಾರ ಸಂಕಿರಣ ದೆಹಲಿಯಲ್ಲಿ ನಡೆಯಿತು. ಇದರ ಅಂಗವಾಗಿ ಗೋಧಿ, ಜಗತ್ತು ಮತ್ತು ಡಿಎನ್‌ಎ ವಿಷಯದೊಂದಿಗೆ ೨೩ ಫೆಬ್ರವರಿ ೧೯೭೭ ರಂದು ೨೫ ಪೈಸೆ ಬೆಲೆಯ ಅಂಚೆ ಚೀಟಿ ಬಿಡುಗಡೆಯಾಗಿದೆ.

೧೯೮೦-೮೧ನೇ ಸಾಲಿನಲ್ಲಿ ಉಳುಮೆ, ಟ್ರಾಕ್ಟರ್, ಮಾವು, ಸೇಬು, ಗೇರು, ನೀರಾವರಿ, ಹಾಲು ಉತ್ಪಾದನೆ, ಕೃಷಿ ಮತ್ತು ತಂತ್ರಜ್ಞಾನ, ಹತ್ತಿ, ರಬ್ಬರ್ ತೆಗೆಯುವುದು ಸೇರಿದಂತೆ ಇತರ ವಿಷಯಗಳ ಅಂಚೆ ಚೀಟಿಯ ಸರಣಿ ಬಿಡುಗಡೆಯಾಗಿದೆ.

ವಿಶ್ವ ಆಹಾರ ದಿನದ ಸಂಕೇತವಾಗಿ ೧೯೮೧ ಅಕ್ಟೋಬರ್ ೧೬ರಂದು ಅಂಚೆ ಚೀಟಿ ಪ್ರಕಟಿಸಲಾಗಿದೆ. ಮೌಲ್ಯ ೧ ರುಪಾಯಿ.

ಭಾರತದಲ್ಲಿ ಬಟಾಟೆ ತಳಿಯ ಸಂಶೋಧನೆಯ ೫೦ನೇ ವರ್ಷದ(೧೯೩೫- ೧೯೮೫) ಅಂಗವಾಗಿ ೫೦ ಪೈಸೆ ಬೆಲೆಯ ಅಂಚೆ ಚೀಟಿ ೧೯೮೫ ಏಪ್ರೀಲ್ ೧ರಂದು ಬಿಡುಗಡೆಯಾಗಿದೆ.

೧೯೯೦ ಜುಲೈ ೩೧ರಂದು ಇಂಡಿಯನ್ ಕೌನ್ಸಿಲ್ ಆಫ್ ಅಗ್ರಿಕಲ್ಚರ್ ರೀಸರ್ಚ್‌ನ ೬೦ನೇ ವರ್ಷದ ಅಂಗವಾಗಿ ಅಂಚೆ ಚೀಟಿ ಪ್ರಕಟಿಸಲಾಗಿದೆ. ಮೌಲ್ಯ ೨ ರುಪಾಯಿ.

೧೯೯೨ ಡಿಸೆಂಬರ್ ೨೨ರಂದು ಹರ್‍ಯಾಣ ರಾಜ್ಯದ ಸಿಲ್ವರ್ ಜುಬ್ಲಿ ಅಂಗವಾಗಿ ಅಂಚೆ ಚೀಟಿ ಪ್ರಕಟಿಸಲಾಗಿದೆ. ವಿದ್ಯುತ್, ರೈತ ಮತ್ತು ಬೆಳೆಯ ವಿಷಯ ಅಂಚೆ ಚೀಟಿಯದ್ದು. ಬೆಲೆ ೨ ರುಪಾಯಿ.

೧೯೯೩ ಮಾರ್ಚ್ ೨೬ರಂದು ಯುನೈಟೆಡ್ ಪ್ಲಾಂಟರ್‍ಸ್ ಅಸೋಸಿಯೇಷನ್ ಆಫ್ ಸೌಥ್ ಇಂಡಿಯಾದ ಶತಮಾನೋತ್ಸವ ಅಂಚೆ ಚೀಟಿ ಬಿಡುಗಡೆಯಾಗಿದೆ. ಬೆಲೆ ೨ ರು.

‘ಈಯರ್ ಇಂಡಿಯನ್ ಟೀ’ ವಿಷಯದಲ್ಲಿ ಟೀ ಎಲೆ ಮತ್ತು ಎಲೆ ಕೊಯ್ಯುವ ವಿಷಯದ ಅಂಚೆ ಚೀಟಿ ೧೯೯೩ ಡಿಸೆಂಬರ್ ೧೧ರಂದು ಬಿಡುಗಡೆಯಾಗಿದೆ. ಬೆಲೆ ೬ ರುಪಾಯಿ.

‘ವೀಟ್ ಸೀಡ್ ಇನ್ ಎ ಟೆಸ್ಟ್ ಟ್ಯೂಬ್(ಡಿನ್‌ಎ ಟ್ರೀಟೆಡ್)’ನ ಅಂಚೆ ನವದೆಹಲಿಯಲ್ಲಿ ೧೯೯೬ ಡಿಸೆಂಬರ್ ೪ ರಂದು ನಡೆದ ೨ನೇ ಅಂತಾರಾಷ್ಟ್ರೀಯ ಕ್ರಾಪ್ ಸೈನ್ಸ್ ಕಾಂಗ್ರೆಸ್‌ನಲ್ಲಿ ಬಿಡುಗಡೆಯಾಗಿದೆ. ಬೆಲೆ ೨ ರುಪಾಯಿ.

ರೈತ ಪರ ಹೋರಾಟಗಾರ, ಕೇಂದ್ರ ಮಂತ್ರಿಯಾಗಿದ್ದ ಪಂಚಾಬರಾವ್ ದೇಶಮುಖ ಅವರ ನೆನಪಿನಲ್ಲಿ ೧೯೯೯ ಡಿಸೆಂಬರ್ ೭ರಂದು ಅಂಚೆ ಚೀಟಿ ಬಿಡುಗಡೆಯಾಗಿದೆ. ಪಂಜಾಬರಾವ್ ದೇಶಮುಖ ಅವರ ಚಿತ್ರ ಇದರಲ್ಲಿದೆ. ಬೆಲೆ ೩ ರು.

೨೦೦೦ನೇ ಇಸವಿಯ ಏಪ್ರಿಲ್ ೨೫ರಂದು ನಾಲ್ಕು ದೇಶೀಯ ಎತ್ತಿನ ತಳಿಯ ಮೇಲೆ ಅಂಚೆ ಚೀಟಿ ಪ್ರಕಟಿಸಲಾಗಿದೆ. ಕರ್ನಾಟಕದ ಹಳ್ಳಿಕಾರ್, ಗುಜರಾತ್‌ನ ಗಿರ್, ಕಂಗ್ರೇಜ್ ಮತ್ತು ತಮಿಳುನಾಡಿನ ಕಂಕಯಮ್ ತಳಿಯ ಪ್ರತ್ಯೇಕ ನಾಲ್ಕು ಅಂಚೆ ಚೀಟಿ ಪ್ರಕಟಿಸಲಾಗಿದೆ. ಮೌಲ್ಯ ಒಂದಕ್ಕೆ ೩ ರು.

೨೦೦೬ರ ಮಾರ್ಚ್ ೩೦ರಂದು ಇಂಡಿಯನ್ ಅಗ್ರಿಕಲ್ಚರ್ ರಿಸರ್ಚ್ ಸೆಂಟರ್‌ನ ಅಂಚೆ ಚೀಟಿ ಬಿಡುಗಡೆಯಾಗಿದೆ.

ಕೃಷಿ ಅಂಚೆ ಚೀಟಿ ಮಾಹಿತಿ ನೀಡಿದವರು ಬೆಳಗಾವಿಯ ಕೆ.ಜಿ.ಕಡೆಕೋಡಿ. ೨೦೦ಕ್ಕೂ ಹೆಚ್ಚು ದೇಶಗಳ ಅಂಚೆ ಚೀಟಿ ಸಂಗ್ರಹಿಸಿದ್ದಾರೆ ಅವರು. ರಾಜ್ಯದ ಹಿರಿಯ ಅಂಚೆ ಚೀಟಿ ಸಂಗ್ರಾಹಕ ಎಂಬ ಹೆಗ್ಗಳಿಕೆಯೂ ಅವರದ್ದು. ಜಗತ್ತಿನ ಅಪರೂಪದ, ಅಮೂಲ್ಯ ಅಂಚೆ ಚೀಟಿಗೆ ಒಡೆಯ. ಹತ್ತಾರು ಪ್ರಶಸ್ತಿ, ಸನ್ಮಾನ. ತಮ್ಮ ಇಳಿ ವಯಸ್ಸಿನಲ್ಲೂ ಹಳೆಯ ಕಾಲದ ವಸ್ತು, ನಾಣ್ಯ ಸಂಗ್ರಹಿಸುವ ಅದಮ್ಯ ಉತ್ಸಾಹ. ರಾಜ್ಯ, ರಾಷ್ಟ್ರ ಮಟ್ಟದಲ್ಲಿ ಅಷ್ಟೇ ಅಲ್ಲ. ಅಂತಾರಾಷ್ಟ್ರೀಯ ಮಟ್ಟದಲ್ಲೂ ಗುರುತಿಸಿಕೊಂಡಿದ್ದಾರೆ ಕಡೆಕೋಡಿ.
‘ಫಾರೆವರ್ ಯಂಗ್’ ಎಂದು ಅಮೇರಿಕಾ ತನ್ನ ಅಂಚೆ ಚೀಟಿಯಲ್ಲಿ ಕೆ.ಜಿ.ಕಡೇಕೋಡಿ ಭಾವಚಿತ್ರವನ್ನು ಮುದ್ರಿಸಿದೆ.ಅಂಚೆ ಚೀಟಿ, ಹಳೆಯ ವಸ್ತು ಸಂಗ್ರಹದ ಗೀಳಿನಿಂದ ಅಮೇರಿಕಾದ ಅಂಚೆ ಚೀಟಿಯಲ್ಲಿ ಕಾಣಿಸಿಕೊಂಡಿರುವುದು ಅವರ ಹವ್ಯಾಸಕ್ಕೆ ಒಂದು ಗೌರವೇ ಸರಿ.೧೯೬೨ರ ಬಳಿಕ ಅಂಚೆ ಚೀಟಿ ಸಂಗ್ರಹದ ಗೀಳಿಗೆ ಬಿದ್ದ ಅವರು ಇಂದು ಅಂಚೆ ಚೀಟಿ ಇತಿಹಾಸವನ್ನು ಸುಲಲಿತವಾಗಿ ಹೇಳುತ್ತಾರೆ. ಗಾಂಧಿ, ಸ್ವಾತಂತ್ರ್ಯ ಹೋರಾಟ, ಹಣ್ಣು, ಸಂಗೀತ, ಕಲೆ- ಸಾಹಿತ್ಯ ಹೀಗೆ ಒಂದೊಂದು ವಿಷಯದ ಮೇಲೆಯೂ ಅಂಚೆ ಚೀಟಿ ಪ್ರದರ್ಶಿಸುವ ಅವರ ಆಸಕ್ತಿ ಒಂದು ಅದ್ಭುತ.

ವಾಹ್.....ತಾಜ್...

2008-11-23T06:39:00.000-08:00

ವಿಶ್ವದ ಏಳು ಅದ್ಭುತಗಳಲ್ಲಿ ತಾಜ್ ಮಹಲ್ ಕೂಡಾ ಒಂದು ಎಂದು ಎಲ್ಲರಿಗೂ ಗೊತ್ತು. ಎಂಎಚ್‌ಓದಲ್ಲಿ ಕಾಣಿಸಿಕೊಂಡ ತಾಜ್ ಮಹಲ್‌ನ ಈ ಚಿತ್ರ ಅದೆಷ್ಟು ಸುಂದರ. ಅಲ್ಲವೇ?

ಕರ್ನಾಟಕದ ನಯಾಗರ.....

2008-10-09T03:31:00.000-07:00

ಮೇ ತಿಂಗಳಲ್ಲಿ ಗೋಕಾಕ ಫಾಲ್ಸ್‌ಗೆ ಹೋದಾಗ ನೀರು ಅತಿ ಕನಿಷ್ಠ ಪ್ರಮಾಣದಲ್ಲಿ ಹರಿಯುತ್ತಿತ್ತು. ಮುಂಗಾರು ಮಳೆಯಲ್ಲಿ ಗಣೇಶ ಜಲಪಾತದ ತುದಿಗೆ ಹೋದಹಾಗೆ ನಾವೂ ಗೋಕಾಕ ಫಾಲ್ಸ್‌ನ ಶಿಲೆಯ ತುದಿಗೆ ಅಥವಾ ನೀರು ಕೆಳಕ್ಕೆ ಬೀಳುವ ತುದಿಗೆ ಹೋಗಿ ಕೂಹೂ...ಹೂ.. ಎಂದಿದ್ದೆವು.
ಆಗಸ್ಟ್‌ನಲ್ಲಿ ಹೋದಾಗ ಅಲ್ಲಿನ ಚಿತ್ರಣವೇ ಬೇರೆ. ೧೭೭ ಮೀ. ಅಗಲಕ್ಕೆ ನೀರು ಹರಿಯುತ್ತಿತ್ತು. ರಭಸವಾಗಿ. ಮೇ ತಿಂಗಳ ಅಂತ್ಯಕ್ಕೂ ಆಗಸ್ಟ್‌ನ ಭೇಟಿಗೂ ಇರುವ ಮಜವೇ ಬೇರೆ. ಜಲಪಾತದ ಅಗಲ ಅಥವಾ ನೀರು ಹರಿಯುವ ಕ್ಷೇತ್ರ ೧೭೭ ಮೀಟರ್. ನೀರು ಕೆಳಕ್ಕೆ ಧುಮುಕುವುದು ಕೇವಲ ೫೨ ಮೀಟರ್ ಎತ್ತರದಿಂದ ಅಷ್ಟೆ. ಹರಡಿ ಹರಡಿ ವಿಶಾಲವಾಗಿ ನೀರು ಬೀಳುತ್ತದೆ. ಆದರೆ ಎತ್ತರ ಕಡಿಮೆ. ಅದಕ್ಕೇ ಅದನ್ನು ಕರ್ನಾಟಕದ ನಯಾಗರ ಎನ್ನುವುದು.
ಘಟಪ್ರಭಾ ನದಿಯ ಈ ಜಲಪಾತದ ಅಕ್ಕ ಪಕ್ಕದ ಊರಿಗೆ ಸಂಪರ್ಕ ಕಲ್ಪಿಸಲು ತೂಗು ಸೇತುವೆ ಇದೆ. ತೂಗು ಸೇತುವೆಯ ಕಿರು ನಡಿಗೆ ಅದ್ಭುತ ಅನುಭವ. ಮೊದಲೇ ಅದು ತೂಗುವ ಸೇತುವೆ. ಕೆಳಗೆ ರಭಸವಾಗಿ ಹರಿಯುತ್ತಿರುವ ನೀರು ನೀರು. ಒಂದು ಮಗ್ಗುಲಿನಲ್ಲಿ ಮುನ್ನುಗ್ಗಿ ಬರುವ ನೀರಿನ ಹರಿವು. ಇನ್ನೊಂದು ಪಕ್ಕ ಧುಮಕುವ ನೀರಿನ ಪ್ರಪಾತ. ಗಾಳಿ- ಜನರ ಓಡಾಟಕ್ಕೆ ಅಲ್ಲಾಡುವ ಸೇತುವೆ. ಎಷ್ಟು ಜಲಪಾತ ನೋಡಿದರೂ ಅಂಥ ತೂಗು ಸೇತುವೆ ನಡಿಗೆ ಅನುಭವ ಭಾರೀ ಅಪರೂಪವೇ. ತೂಗು ಸೇತುವೆ ಉದ್ದ ೨೧೦ ಮೀ.
ಅಂದಹಾಗೆ ಗೋಕಾಕ ಫಾಲ್ಸ್‌ನಲ್ಲಿ ೧೮೮೭ರಿಂದಲೇ ವಿದ್ಯುತ್ ಉತ್ಪಾದನೆ ಮಾಡಲಾಗುತ್ತಿದೆ. ಇದು ದೇಶದಲ್ಲೇ ಮೊದಲು. ಗೋಕಾಕದದ ಬಳಿ ಗೊಡಚಿನ ಮಲ್ಕಿ ಎಂಬ ಇನ್ನೊಂದು ಸುಂದರ ಜಲಪಾತವಿದೆ. ಗೋಕಾಕ ಕರದಂಟು, ಗೋಕಾಕ್ ಮಿಲ್‌ನ ಬಟ್ಟೆಗೂ ಪ್ರಸಿದ್ಧ.

ಅವರದು ಸರಳ ಜೀವನ

2008-10-01T06:08:00.001-07:00

ವರ್ಷವೂ ಅ.೨ರಂದು ಗಾಂಧಿ ಜಯಂತಿ ಆಚರಿಸುತ್ತೇವೆ. ಅದರಂತೆ ಈ ವರ್ಷವೂ ಕೂಡಾ.
ಸದಾಶಿವ ಭೋಸಲೆ ಅವರ ವಯಸ್ಸು ೮೮. ಚರಕದಲ್ಲಿ ನೂಲು ತೆಗೆದು, ಮಗ್ಗಕ್ಕೆ ಕೊಡುತ್ತಾರೆ. ಅದೇ ಬಟ್ಟೆಯನ್ನು ಧರಿಸುತ್ತಾರೆ. ಇನ್ನೂ ಸ್ವ ಕೃಷಿಕಾರ್‍ಯದಲ್ಲಿ ತೊಡಗುತ್ತಾರೆ. ಅವರು ಮಾಜಿ ಶಾಸಕರು. ಅವರದು ಸರಳ ಜೀವನ.
ಅವರು ಕುರಿತ ಲೇಖನವನ್ನು ಓದಿ.
http://www.kannadaprabha.com/NewsItems.asp?ID=KP420080927050110&Title=Sapthahikaprabha&lTitle=%D1%DB%AE%DB%A1%D5O%DA%AE%DA%C3%BA%DA&Topic=0&ndate=9/28/2008&Dist=0

ನೀವೇ ಊಹಿಸಿಕೊಳ್ಳಿ

2008-09-27T04:02:00.000-07:00

ಜಲಪಾತದಲ್ಲಿ ನೀರು ಇಳಿಜಾರಿನೆಡೆ ಬೀಳುವುದು ಸಹಜ. ಈ ಫೋಟೋದಲ್ಲೂ ಆದೇ ರೀತಿ ಕೆಳಮುಖವಾಗಿಯೇ ನೀರು ಹರಿಯುತ್ತಿದೆ. ಅಲ್ಲವೇ? ಜಲಪಾತ ಅಥವಾ ತಡಸಲಿನಲ್ಲಿ ನೀರು ಮೇಲಿನಿಂದ ಕೆಳಕ್ಕೆ ಬೀಳುವುದನ್ನು ಎಲ್ಲರೂ ನೋಡಿರುತ್ತಾರೆ. ನಾನೂ ನೋಡಿದ್ದೇನೆ. ಆದರೆ ಈ ಎರಡು ಚಿತ್ರದಲ್ಲಿ ನೀರು ಹೇಗೆ ಹರಿದು ಸಾಗಿದೆ? ನೀವೇ ಊಹಿಸಿಕೊಳ್ಳಿ.

ಅಂಬೋಲಿಯ ಅಂದವೂ....ಅದರ ಚಂದವೂ......

2008-08-19T11:29:00.000-07:00

ಅಂಬೋಲಿಗೆ ಹೋಗಿ ತಿರುಗಿ ಬರುವಾರ ಹೀಗೆ ಅನಿಸದೇ ಇರದು. ಅಲ್ಲಿನ ನಿಸರ್ಗದ ರಮಣೀಯತೆ ಹಾಗಿದೆ. ಅಂಥದ್ದೊಂದು ಸ್ಥಳ ನೋಡಿ ಗೆಳೆಯ ಗಿರೀಶ ಎರಡು ಮಾತು ಹೇಳತ್ತಾನೆ. ೧) ಸಿಎ ರಿಸಲ್ಟ್ ಏರುಪೇರಾದರೆ ಇಲ್ಲಿಗೆ ಬರಬೇಕು. ೨) ಬದುಕಿನಲ್ಲಿ ಏನೂ ಇಲ್ಲ ಅಂದು ಕೊಂಡವರೂ ಇಲ್ಲಿಗೆ ಒಮ್ಮೆ ಬರಬೇಕು. ಆದರೆ, ಪ್ರಸಾದ ಹೇಳುವುದೇ ಬೇರೆ. ಅವನ ಪ್ರಕಾರ, ಆ ದೊಡ್ಡ ಹಸಿರು ಗುಡ್ಡದ ಅಂತಿಮ ತುದಿಯ ಮಣ್ಣಿನಲ್ಲಿ ಬೆಳೆದ ಕುಬ್ಜ ಗಿಡ. ಅದನ್ನು ನೋಡಿ ಇದು ಜಗತ್ತಿನ ಕೊನೆಯ ಗಿಡ ಎಂಬಂತೆ ಭಾವನೆ.

ಸುಮಾರು ೨೦ಕ್ಕೂ ಹೆಚ್ಚು ಜಲಪಾತಗಳ ಸರಣಿ. ಹಸಿರು ಗುಡ್ಡದ ಸಾಲು ಸಾಲು. ಮೈಗೆ ಮುತ್ತಿಕ್ಕಿ ಹಾರಿ ಹೋಗುವ ಮಂಜಿನ ಹೊಗೆ. ಮಳೆಯನ್ನೂ ಲೆಕ್ಕಿಸದೇ ಪ್ರಕೃತಿ ನೋಡುವ ತವಕ. ಅಂಥ ಒಂದು ಪರಿಸರ ಅದೆಷ್ಟು ಪುಳಕಿತವಾಗಿ ಮಾಡಿಬಿಡುತ್ತದೆ ಎಂದು ಮಾತಿನಲ್ಲಿ ಹೇಳಲಾಗದು......ಅಷ್ಟು.
ಸಮುದ್ರ ಮುಟ್ಟದಿಂದ ೨೩೪೦ ಅಡಿ ಎತ್ತರದ ಗಿರಿಗಳ ಸಾಲು. ಎಲ್ಲಿ ನೋಡಿದರೂ ಹಸಿರು. ಪಶ್ಚಿಮಘಟ್ಟ ಪ್ರದೇಶದಲ್ಲಿ ಬರುವ ಸಿಂಧುದುರ್ಗ ಎಂಬ ಆ ಪ್ರದೇಶ ಅದ್ಧುತ. ವರ್ಷಕ್ಕೆ ಸುಮಾರು ೫೦ ಸಾವಿರ ಜನ ಇಲ್ಲಿಗೆ ಭೇಟಿ ನೀಡುತ್ತಾರೆ. ವೀಕೆಂಡ್ಗೆ ಜನ ಜಾತ್ರೆ. ಸಾಯುವ ಮೊದಲು ನೋಡುವ ಪ್ರದೇಶಗಳಲ್ಲಿ ಇದೂ ಒಂದು ಎಂಬ ಪ್ರತೀತಿ. ಆದರೆ ಅಲ್ಲಿ ಮತ್ತೇನೂ ಇಲ್ಲ. ಇರುವುದು ಸುಂದರ ಪರಿಸರ ಮಾತ್ರ. ಮಳೆಗಾಲದಲ್ಲಿ ಅಂಬೋಲಿ ಘಟ್ಟ ಪ್ರದೇಶ ನೀರು, ಜನರಿಂದ ತುಂಬಿ ಹೋಗುತ್ತದೆ. ಹಚ್ಚ ಹಸಿರಿನ ಹೊದಿಕೆ ಎಲ್ಲೆಲ್ಲೂ ತೆರೆಯುತ್ತದೆ.
ಅಂಬೋಲಿ ಮಹಾರಾಷ್ಟ್ರದ ಸಿಂಧುದುರ್ಗ ಜಿಲ್ಲೆಯಲ್ಲಿ ಇದೆ. ಬೆಳಗಾವಿಯಿಂದ ೯೦ ಕಿ.ಮಿ. ದೂರ. ಕಾರವಾರ ಅಲ್ಲಿಂದ ಸಾವಂತವಾಡಿ ಮೂಲಕವೂ(ಎನ್ಎಚ್ ೧೭) ಅಂಬೋಲಿ ತಲುಪಬಹುದು. ಮಳೆಗಾಲದ ಭೇಟಿಯೇ ಹೆಚ್ಚು ರೋಮಾಂಚನ ನೀಡುವ ಕಾಲ. ಅಂಬೋಲಿಯಲ್ಲಿ ನೋಡುವ, ಇನ್ನೂ ಹುಡುಕುವ ಸ್ಥಳವೂ ಇದೆ. ಕಾಡು, ಬೆಟ್ಟ ಸುತ್ತುವವರಿಗೆ ಇಂಥದ್ದೊಂದು ಸ್ಥಳ ತೀರಾ ಆಪ್ಯಾಯ.

ಮನದಾಳದಲ್ಲಿ ಊಟಿಯ ‘ಡೆಸ್ಟಿನಿ’

2008-07-30T23:48:00.000-07:00

ಊಟಿಗೆ ಹೋಗುವುದೇ ಒಂದು ಹೊಸ ಅನುಭವ. ಅಲ್ಲಿನ ವಾತಾವರಣವೂ ಹೌದು. ಇದರೊಂದಿಗೆ ಇನ್ನಷ್ಟು ಹೊಸ ಅನುಭವ ನೀಡುವ ರಮ್ಯ ತಾಣ ಡೆಸ್ಟಿನಿ ಎಂಬ ಫಾರ್ಮ್ ಸ್ಟೇ.
ಡೆಸ್ಟಿನಿ ಊಟಿಯಿಂದ ೨೦ ಕಿ.ಮೀ ದೂರದಲ್ಲಿದೆ. ಅದು ಹೊರ ಜಗತ್ತಿನಿಂದ ಸಂಪೂರ್ಣ ದೂರವಿರುವ ಪ್ರದೇಶ. ಅದು ಹೊಟೇಲ್ ಅಥವಾ ರೆಸಾರ್ಟ್ ಅಲ್ಲ. ಊಟಿಗೆ ಹೋದವರು ಡೆಸ್ಟಿನಿ(ಫಾರ್ಮ್ ಸ್ಟೇ)ಯಲ್ಲಿ ಉಳಿದರೆ ಹೊಸ ಅನುಭವ ಸವಿಯಲು ಸಾಧ್ಯವಾಗುವ ವಾತಾವರಣ ಅಲ್ಲಿದೆ.
ಡೆಸ್ಟಿನಿಗೆ ಪ್ರಯಾಣಿಸುವ ರಸ್ತೆ ಮಾರ್ಗವೇ ಒಂದು ಅದ್ಬುತ ಅನುಭವ ನೀಡುತ್ತೆ. ಬೆಂಗಳೂರಿನಿಂದ ನಾವು ಊಟಿ, ಅಲ್ಲಿಂದ ೧೮ ಕಿ.ಮೀ ದೂರ ಕಾರಿನಲ್ಲಿ ಆರಾಮವಾಗಿ ಹೋಗಿದ್ದು. ಹಾಗಾದ್ರೆ ಮುಂದಿನ ೨ ಕಿ.ಮಿ ಪ್ರಯಾಣ ಕಷ್ಟವೇ?
ಕಷ್ಟವಲ್ಲ... ಆದ್ರೆ? ಅದೊಂಥರಾ ಸಾಹಸದ ಪ್ರಯಾಣ. ಕಾಶ್ಮೀರದ ಕಣಿವೆ ಪ್ರದೇಶದಲ್ಲಿ, ಲೇಹ್, ಲಡಾಕ್ ರಸ್ತೆಯಲ್ಲಿ ಈ ರೀತಿಯ ವಾಹನ ಸಾಗುವುದನ್ನು ಟಿವಿಯಲ್ಲಿ ನೋಡಿದ್ದೆ. ಅದು ಸೇನೆ ಬಳಸುವ ವಾಹನ. ಭಾರೀ ಗಟ್ಟಿಮುಟ್ಟಾದ, ಶಕ್ತಿ ಇರುವ ಟ್ರಕ್ ಅದು. ಆ ಟ್ರಕ್ ಮಾತ್ರ ಆ ರಸ್ತೆಯಲ್ಲಿ ಸುಲಭವಾಗಿ ಹೋಗೋದು. ಗುಡ್ಡ..ಗುಡ್ಡ.. ಕಾಡು... ತಿರುಗು ಮುರುಗು ರಸ್ತೆ.... ಏರಿಳಿತದ ರಸ್ತೆ. ಹೊಂಡ, ಕಲ್ಲಿನ ತುಂಡು. ಇದನ್ನೆಲ್ಲ ಲೆಕ್ಕಿಸದೇ ಹೋಗುವ ಆ ಟ್ರಕ್ ಪ್ರಯಾಣ ಒಂದು ರೀತಿಯ ಭಯ ಮಿಶ್ರಿತ ಆನಂದ ನೀಡುವುದರಲ್ಲಿ ಎರಡು ಮಾತಿಲ್ಲ.
ಹಾಗೆ ಸುಮ್ಮನೆ ಊಟಿಗೆ ಹೋದರೂ ಸರಿ, ಹನಿಮೂನ್ಗೆಂದು ಊಟಿಗೆ ಹೋಗಿದ್ದರೂ ಸರಿ. ಮೊದಲಬಾರಿಗೋ ಅಥವಾ ಹನಿಮೂನ್ಗೋ ಹೋದರೆ ಊಟಿ ಮನದಾಳದಲ್ಲಿ ಉಳಿದೇ ಉಳಿಯುತ್ತೆ. ಸಂದೇಹ ಬೇಡವೇ ಬೇಡ. ಅಲ್ಲಿನ ಪ್ರಕೃತಿಯೇ ಹಾಗೆ. ಡೆಸ್ಟಿನಿಯ ವಾತಾವರಣವೂ ಇದಕ್ಕೆ ಇಂಬು ಕೊಡುತ್ತದೆ.
ಸಿಟಿ ಜೀವನ ಮಾಡಿದವರಂತೂ ಡೆಸ್ಟಿನಿಯಲ್ಲಿ ಹೊಸ ಸನ್ನಿವೇಶ ನೋಡಲು ಸಾಧ್ಯ. ಕಾಡು, ಸುಂದರ ಪರ್ವತ ಶ್ರೇಣಿ ಊಟಿಯ ಸಾಮಾನ್ಯ ಚಿತ್ರಣ. ಡೆಸ್ಟಿನಿ ಅಂತಹ ಪರಿಸರದಲ್ಲೇ ಇದೆ. ಮೂರು ದಿಕ್ಕಿಗೂ ಹಸಿರು ಬೆಟ್ಟಗಳು. ಇನ್ನೊಂದೆಡೆ ನೀರು. ಪ್ರಕೃತಿಯ ರಮ್ಯ ವಾತಾವರಣದಲ್ಲಿ ಸಮಯ ಕಳೆದದ್ದೇ ತಿಳಿಯುವುದಿಲ್ಲ. ವಸತಿ, ಊಟದೊಂದಿಗೆ ಡೆಸ್ಟಿನಿಯಲ್ಲಿ ಹಲವು ವೈವಿಧ್ಯವಿದೆ.
ಏನೇನು ಇದೆ?: ಅಗ್ರಿಕಲ್ಚರ್ ಟೂರ್, ಮೌಂಟೇನ್ರಿಂಗ್ ಆಂಡ್ ರ್ಯಾಪ್ಲಿಂಗ್, ಹಾರ್ಸ್ ರೈಡಿಂಗ್, ಡೇರಿ ವಿಸಿಂಟ್, ರಿವರ್ ಕ್ರಾಸಿಂಗ್, ಟ್ರಾಕ್ಟರ್ ಆಂಡ್ ಓಪನ್ ಜೀಪ್ ರೈಡ್, ಸ್ಪೋರ್ಟ್ಸ್, ಫಿಶಿಂಗ್ ಇಲ್ಲಿದೆ. ಅವಲಾಂಚಿ ಡ್ಯಾಮ್ನ ಹಿನ್ನೀರು ಇಲ್ಲಿನ ಸೌಮ್ಯ ವಾತಾವರಣವನ್ನು ಇನ್ನಷ್ಟು ಆಕರ್ಷಣೀಯವಾಗಿಸಿದೆ.
ಡೆಸ್ಟಿನಿಯಲ್ಲಿ ಡಿಲಕ್ಸ್ ಮತ್ತು ಲಕ್ಸುರಿ ರೂಮ್ಗಳಿವೆ. ಸೀಸನ್ ಮತ್ತು ಆಫ್ ಸೀಸನ್ಗೆ ದರದಲ್ಲಿ ಹೆಚ್ಚು ಕಡಿಮೆ ಇದೆ. ಅಂದಹಾಗೆ ಸೀಸನ್ ಅವಧಿ ಮಾರ್ಚ್ ೧೬ರಿಂದ ಜೂನ್ ೧೫ ಮತ್ತು ಸೆಪ್ಟೆಂಬರ್ ೧೬ರಿಂದ ಜನವರಿ ೩೧. ಆಪ್ ಸೀಸನ್ ಜೂನ್ ೧೬ರಿಂದ ಸೆಪ್ಟೆಂಬರ್ ೧೫ ಮತ್ತು ಫೆಬ್ರವರಿ ೧ರಿಂದ ಮಾರ್ಚ್ ೧೫.
sundance
ಕಾಡು. ಎದುರಿಗೆ ನೀರಿನ (ವೀವ್ಪ್ಯಾಂಟ್)ಸರೋವರ. ಗೌಜು, ಗಲಾಟೆಯಿಲ್ಲ. ಆಧುನಿಕ ವಿನ್ಯಾಸದ ಸುಂದರ ಒಂಟಿ ಮನೆ. ನವೀನ ಒಳ ವಿನ್ಯಾಸ. ನೀವು ಅಥವಾ ನಿಮ್ಮವರು ಮಾತ್ರ ಅಲ್ಲಿ. ಹಾಗಾದ್ರೆ..ಅದು ಸನ್ಡ್ಯಾನ್ಸ್. ಹನಿಮೂನ್ಗೆ ಅಥವಾ ಏಕಾಂತಕ್ಕೆ ಹೇಳಿ ಮಾಡಿಸಿದ ಸ್ಥಳ.
sundance ಒಂದು ಸಿಂಗಲ್ ಕ್ಯಾಬಿನ್. ಡೆಸ್ಟಿನಿಯ ಹತ್ತಿರವೇ ಇರುವ ಏಕಾಂತ ಸ್ಥಳ. ಹನಿಮೂನ್ಗೆ ಎಂದು ಊಟಿಗೆ ಹೋದ್ರೆ sundane ನಲ್ಲಿ ಒಂದು ಪೂರ್ತಿ ದಿನ ಕಳೆಯಲೇ ಬೇಕು ಎಂದು ಅನಿಸದೇ ಇರದು.
ನಮ್ಮನ್ನು sundance ಕರೆದೊಯ್ದ ಪೊನ್ನಪ್ಪ ಭರ್ಜರಿ ಸಾಹಸಿಗ. ಬೋಳು ಗುಡ್ಡೆಯ ತುದಿಯ ಓರೆ...ಕೋರೆಯ ರಸ್ತೆಯಲ್ಲಿ ಅದೇಗೆ ಆ ಜೀಪು ಬಿಟ್ಟಿದ್ರು ಅಂದ್ರೆ.. ಅಬ್ಬಾ...!
ಅಥವಾ ಡೆಸ್ಟಿನಿಗೆ ಪ್ರಯಾಣ ಮಾಡುವುದೇ ಒಂದು ಥ್ರಿಲ್. ಸುಮಾರು ೩ ಕಿ.ಮಿ. ಗುಡ್ಡದ- ಕಡಿದಾದ ರಸ್ತೆಯಲ್ಲಿ ಮಾಡುವ ಪ್ರಯಾಣ ಒಂದು ಅದ್ಬುತ ಅನುಭವ.
www.littlearth.in

ಮಳೆ ಅರಿಯಲು ಒಂದು ಗಾದೆ

2008-07-18T12:36:00.000-07:00

ಆಗಿಯ ಹುಣ್ಣೆಮೆ ಹೋದ
ಮಿಗೆ ೩ ದಿನಕ್ಕೆ,
ಮೃಗಧರನ ಕೂಡ,
ಮೃಗವಿರಲು ಮಳೆಗಾಲ ಜಗದಣಿಯಲಕ್ಕು ಸರ್ವಜ್ಞ.

ಮಳೆಗಾಲದ ಕುರಿತು ಸರ್ವಜ್ಞ ಹೀಗೆ ಹೇಳಿದ್ದಾರೆ. ನಿಜಕ್ಕೂ ಮಳೆ ಒಂದು ಅದ್ಭುತ ಪ್ರಾಕೃತಿಕ ಶಕ್ತಿ. ಇಳೆಗೆ ಜೀವ ಪೋಷಕ. ಇದಕ್ಕೇ ಮಳೆಯ ಕಲ್ಪನೆ, ನಂಬಿಕೆಯೂ ವಿಶಿಷ್ಟ. ಮಳೆಗೆ ಪೂಜ್ಯ ಸ್ಥಾನವೂ ಇದೆ. ಮಳೆ ಸುರಿಯುವಂತೆ ಕೈಗೊಳ್ಳುವ ಹಬ್ಬಗಳಲ್ಲೂ ಪ್ರಾದೇಶಿಕ ವೈವಿಧ್ಯ. ಕೃಷಿಕರು, ಗ್ರಾಮೀಣ ಜನರು ಮಳೆಯ ವಿವರಣೆ ಕೊಡುವ ಶೈಲಿಯೂ ಬೇರೆ.
ಕನ್ಯಾ ತಿಂಗಳ ಮಳೆ ಕಂಡಲ್ಲಿ ಹೊಯ್ಯುದ್ರೆ, ಆರಿದ್ರೆ ಮಳೆ ಆರದಂತೆ ಹೊಯ್ಯುತ್ತದೆ. ಮಗೆ ಮಳೆ ಮೊಗೆ ಮೊಗೆದು ಹೊಯ್ಯುತ್ತೆ. ಹುಬ್ಬೆ ಮಳೆ ಹೊಯ್ದರೆ ಅಬ್ಬೆ ಮೊಲೆಹಾಲು ಉಂಡಷ್ಟು ಒಳ್ಳೆದು. ಸ್ವಾತಿ ಮಳೆ ಹೊಯ್ದರೆ ಸಮುದ್ರದಲ್ಲಿ ಮುತ್ತು ಬೆಳೀತು. ಹೀಗೆ ಬಗೆಬಗೆಯಾಗಿ ಮಳೆಯನ್ನು ಗಾದೆ ಮಾತಲ್ಲಿ ಹೇಳುತ್ತಾರೆ. ಆಯಾ ನಕ್ಷತ್ರದ ಮಳೆ ಹೇಗೆ ಎಂಬುದನ್ನು ಅರಿಯಲು ಒಂದು ಗಾದೆ ಸಾಕು. ಒಂದೊಂದು ಮಳೆಗೂ ಒಂದು ಗುಣಲಕ್ಷಣ.
ಅಸಲೆ(ಆಶ್ಲೇಷಾ) ಮಳೆಗೆ ಹಂಚಿನ ಮೇಲೆಲ್ಲ ಹುಲ್ಲು, ಭರಣಿ ಸುರದ್ರೆ ಭರಗಾಲದ ಭಯವಿಲ್ಲ, ಭರಣಿ ಹುಯ್ದರೆ ಧರಣೆಲ್ಲ ಬೆಳೆ.
ಸ್ವಾತಿ ಚೇತನ :ಸ್ವಾತಿಯ ಮಳೆ ಹೋದ ಮ್ಯಾಗ ಐತೇನು?, ಚಿತ್ತಿ, ಸ್ವಾತಿ ಆದ್ರೆ ಹಿಂಗಾರಿ ಬೆಳೆ ಬಂಗಾರ್ದಂಗೆ, ಸ್ವಾತಿ ಮಳೆಯಾದ್ರೆ ಹುಲ್ಲೂ ಹೊಡೆ, ಸ್ವಾತಿ ಮಳೆಯಾದ್ರೆ ಚಾಪೆ ಕೆಳಗಿನದೂ ತೆನೆಯಾಗ್ತದೆ. ಸ್ವಾತಿ ಮಳೆ ಹೇಗೆ ಆರ್ಭಟಿಸುತ್ತದೆ ಎಂಬುದಕ್ಕೆ: ಸ್ವಾತಿ ಮಳೆ ಹೊರಗೆ ಹೋಗಿ ಹೇಲೋಕೂ ಬಿಡೋದಿಲ್ಲ.
ಹಸ್ತಾ ಮಳೆ ಸಮೃದ್ಧಿ :ಈ ಮಳೆ ಸುರಿಯದಿದ್ದರೆ ಕಷ್ಟ ತಪ್ಪಿದ್ದಲ್ಲ ಎಂಬ ಮಾತು ಇದೆ. ಹಸ್ತ ಮಳೆ ಆಗದಿದ್ರೆ ಹಲ್ಲು ಕಿಸ್ತಾ, ಹಸ್ತದ ಮಳೆ ಆಗದಿದ್ದರೆ ಹೆತ್ತ ತಾಯಿ ಹಿಟ್ಟು ಕೊಡಲ್ಲ ಎನ್ನುತ್ತಾರೆ.
ಹಸ್ತಾ ಮಳೆಯ ರೈತ ಮಿತ್ರ ಎಂಬ ನಂಬಿಕೆ. ಈ ಮಳೆ ರೈತನ ಕೈ ಹಿಡಿಯುತ್ತದೆ. ಹಸ್ತಾ ಕೈ ಭಾಷೆ ಕೊಟ್ಟಿದೆ ಎನ್ನುತ್ತಾರೆ ರೈತರು. ಮನ ಬಂದಂತೆ ಬೀಳುವ ಮಳೆ ಚಿತ್ತಾ. ಅದಕ್ಕೆ ಕುರುಡು ಚಿತ್ತೆ ಎನ್ನುತ್ತಾರೆ. ಅಣ್ಣನ ಮನೆಲಿ ಚಿತ್ತೆ ಬಿದ್ರೆ ತಮ್ಮನ ಮನೆಯಲ್ಲಿ ಬೀಳುವುದಿಲ್ಲವಂತೆ.
ಉತ್ತರ ಮಳೆ ಬಂದ್ರೆ ಬಿತ್ತಿದ್ದೆಲ್ಲಾ ಫಲ, ಉತ್ರೆ ಮಳೆಗೆ ಹುಟ್ಟ ಹುಲ್ಲೆಲ್ಲ ಹೊಡೆ.
ಮೃಗಸಿರಿ ಮಳೆಗೆ ಮಿಕ್ಪಕ್ಕದ್ದೆಲ್ಲ ಚೆಲ್ಲಬೇಕು ಎನ್ನುತ್ತಾರೆ. ಅದಕ್ಕೇ ಮೃಗಶಿರಾ ಮಳೆಯಲ್ಲಿ ಕೃಷಿಕರು ಸಸಿ, ಗಿಡಗಳನ್ನು ಹೆಚ್ಚು ನಾಟಿ ಮಾಡುತ್ತಾರೆ. ಆರಿದ್ರಿ ಮಳೆಲಿ ಹಚ್ಚಿದರೆ ಆರುಕಾಯಿ ಹೆಚ್ಚು, ಅಶ್ವಿನಿ ಮಳೆಗೆ ಆರುಕಟ್ಟು, ಭರಣಿ ಮಳೆಗೆ ಬೀಜ ಬಿತ್ತು ಎನ್ನೋದು. ಕುಲ್ಡನ ಮಳೆಗೆ ಕಲ್ಲಂಗ್ಡಿ ಊರಿದ್ರೆ ಉಲ್ಡುಲ್ಡಿ ಕಾಯಿ ಬಿಡ್ತವೆ ಎನ್ನೋ ನಂಬಿಕೆ.
ಉಬ್ಬೆ ಮಳೇಲಿ ಮೋಡ ಉಬ್ಬುಬ್ಬಿ ಬರುತ್ತೆ ಎಂಬ ಮಾತು. ಮಗೆ ಮಳೆ ನಂಜಿನ ಮಳೆ. ತುಂಬಾ ಮಳೆಯಾದ್ರೆ ನಾಟಿ ಮಾಡಿದ ಸಸಿಗಳು ಕೊಳೆಯುತ್ತವೆ.
ಮಳೆಯೇ ಇಲ್ಲವಾದ್ರೆ: ಮಳೆ ಇಲ್ಲದ ಪೈರು ಮಾತು ಇಲ್ಲದ ಕೂಸು ಸಮ ಎನ್ನುತ್ತಾರೆ.
ಕೆಲವು ಮಳೆಗಳು ಅಕಾಲದಲ್ಲಿ ಸುರಿದು ಬೆಳೆ ಹಾಳು ಮಾಡುತ್ತದೆ. ಅಂತಹ ಮಳೆತಿ ಮೆದೆಗೆಡುಕ ಕಣಗೆಡುಕ.
ಭಾರೀ ಮಳೆ ಬಂತು ಎನ್ನಿ, ಆವಾಗ ಏನಪ್ಪಾ ಮಳೆ... ಹೇಳೋದು ಸಾಮಾನ್ಯ. ಅದಕ್ಕೆ- ‘ಮಳೆ ಬಂದರೆ ಕೇಡೇ, ಮಗ ಉಂಡ್ರೆ ಕೇಡೇ’. ಮಗ ಊಟ ಮಾಡಿದ್ರೆ ತೊಂದ್ರೆ ಆಗುತ್ಯೇ? ಹಾಗೇ ಮಳೆ ಹೊಯ್ದರೆ ಕೇಡು ಆಗುವುದುಂಟೇ ಎಂದು ಹೇಳುತ್ತಾರೆ.
ಬೆಳಗ್ಗೆ ಬಂದ ನೆಂಟ ರಾತ್ರಿವರೆಗೆ ಇರುವುದಿಲ್ಲ ಎಂದೂ ಸಂಜೆ ಬಂದ ಮಳೆ ಮತ್ತು ನೆಂಟ್ರು ಬೇಗನೆ ಹೋಗುವುದಿಲ್ಲ ಎಂಬ ವಾಡಿಕೆಯೂ ಇದೆ.
ಮಳೆ ಮುನ್ಸೂಚನೆ :ಮುಂಗಾರು ಕೇರಳ ಪ್ರವೇಶಿಸಿದೆ, ಬಂಗಾಳಕೊಲ್ಲಿ ಪ್ರವೇಶಿಸಿದೆ ಇನ್ನೇನು ವಾರದಲ್ಲಿ ಇಲ್ಲಿಗೆ ಬರುತ್ತದೆ ಎಂದು ಈಗ ಹವಾಮಾನ ತಜ್ಞರು ಸಾಧ್ಯತೆಯ ವರದಿ ನೀಡುತ್ತಾರೆ. ಹಾಗಾದ್ರೆ ಮೊದಲು ಮಳೆ ಮುನ್ಸೂಚನೆ ಯಾರು ಕೊಡ್ತಿದ್ರು?
ಮಲೆನಾಡಿನಲ್ಲಿ ಒಂದು ಜಾತಿಯ ಇರುವೆ ರೆಕ್ಕೆ ಪಡೆದು ಭೂಮಿಯಿಂದ ಹೊರಕ್ಕೆ ಬರುತ್ತದೆ. ಎಷ್ಟೆಂದರೆ ಆ ಪ್ರದೇಶದಲ್ಲಿ ಮಾಮೂಲಿಯಾಗಿ ಓಡಾಡಲು ಸಾಧ್ಯವಾಗುವುದಿಲ್ಲ. ಮುಖ, ಮೈಗೆ ಮುತ್ತಿಕೊಳ್ಳುತ್ತವೆ. ಇದು ಕೂಡಾ ಮಳೆಯ ಮುನ್ಸೂಚನೆ. ಇನ್ನು ಕಿಟ್ರ್ರ್..... ಎಂದು ಕೂಗುವ ಮಳೆ ಜಿರಲೆ ಪ್ರತ್ಯಕ್ಷವಾಗುವುದು ಮಳೆಯ ಮುನ್ಸೂಚನೆ. ಮಳೆಗಾಲದ ಆರಂಭದಲ್ಲಿ ಮಾತ್ರ ಕೂಗಿ ಕೂಗಿ ಮಳೆ ಕರೆದು ತನ್ನ ಕಾರ್ಯ ಪೂರ್ತಿಗೊಳಿಸುತ್ತದೆ ಈ ಮಳೆ ಜಿರಲೆ. ಆರ್ಕಿಡ್ ಜಾತಿಯ(ಪರಾವಲಂಬಿ ಸಸ್ಯ) ಸೀತಾಳೆ ಹೂವು ಮರದ ಮೇಲೆ ಬಿಡುವುದು, ಚಳ್ಳೆ ಹಣ್ಣು ಬಿಡುವುದು, ಕಾಗೆ ಕೂಗುತ್ತ ಊರು ಸುತ್ತಿದ್ರೆ ಮಳೆ ಬರುತ್ತದೆ ಎಂಬ ಮುನ್ಸೂಚನೆ.
ಕುಂಡ ಬೆಳಕು ಮರದ ತುದಿ ಏರಿದ್ರೆ ಮಳೆಗಾಲ ಆರಂಭ ಎಂಬ ಇನ್ನೊಂದು ಮಾತಿದೆ. ಕುಂಡ ಬೆಳಕು ಅಂದ್ರೆ ಕುಂಡೆ ಭಾಗದಲ್ಲಿ ಬೆಳಕು ಸೂಸುವ ಒಂದು ಜಾತಿ ಹುಳು. ಮಲೆನಾಡಿನಲ್ಲಿ ಇವು ಮಳೆಗಾಲದ ಆರಂಭದಲ್ಲಿ ಕಂಡಬರುತ್ತವೆ. ಈ ಹುಳುಗಳು ಬೆಳಕು ಸೂಸುತ್ತ ಮರದ ತುದಿಯ ವರೆಗೆ ಹಾರಾಡಿದ್ರೆ ಮಳೆಗಾಲ ಶುರುವಾಗಿದೆ ಎಂದೇ ಅರ್ಥ.
ಗುಬ್ಬಿ ಮಣ್ಣು ಸ್ನಾನ ಮಾಡಿದ್ರೆ, ಎತ್ತು ತಂಪು ಹೊತ್ತಿನಲ್ಲಿ ಕತ್ತು ಎತ್ತಿ ಆಕಾಶ ಮೋಡಿದ್ರೆ, ಮುಸ್ಸಂಜೆಯಲ್ಲಿ ಗೂಬೆ ಕೂಗಿದ್ರೆ, ಬೆಕ್ಕು ಮುಖ ತೊಳಿದ್ರೆ, ಕಪ್ಪೆ ಎಡೆಬಿಡದೆ ಒಟ ಗುಟ್ಟಿದ್ರೆ ಕೂಡಾ ಮಳೆಯ ಮುನ್ಸೂಚನೆ ಎಂದು ಬಗೆಯುತ್ತಾರೆ. ಡಾಂಕ್ರರ್ ಕಪ್ಪೆ(ದೊಡ್ಡ ಕಪ್ಪೆ) ಡ್ರಾಂಕ್.. ಡ್ರಾಂಕ್... ಎಂದು ಸಾಮೂಹಿಕವಾಗಿ ಕೂಗುತ್ತಿದ್ದರೆ ಅದು ಮಳೆ ಕರೆಯುತ್ತಿದೆ ಎಂಬ ಭಾವನೆ.
ಮುಗೀತಾ ಮಳೆಗಾಲ? :ಚಂದ್ರನ ಸುತ್ತ ಮಂಡಲ ಬಂದ್ರೆ, ಬೆಳಗ್ಗೆ ಇಬ್ಬನಿ ಹೆಚ್ಚಿಗೆ ಬಿದ್ರೆ, ಎರಡು ಕಾಮನಬಿಲ್ಲು ಕಟ್ಟಿದ್ರೆ ಮಳೆಗಾಲ ಮುಗಿತು ಎಂಬ ನಂಬಿಕೆ.
ಒಟ್ಟು ೨೭ ಮಳೆ ನಕ್ಷತ್ರಗಳಿವೆ. ಅವು, ಅಶ್ವಿನಿ, ಭರಣಿ, ಕೃತ್ತಿಕಾ, ರೋಹಿಣಿ, ಮೃಗಶಿರಾ, ಆರಿದ್ರಾ, ಪುನರ್ವಸು, ಪುಷ್ಯ, ಆಶ್ಲೇಷಾ, ಮಗಾ, ಹುಬ್ಬಾ, ಉತ್ತರಾ, ಹಸ್ತ, ಚಿತ್ತ, ಸ್ವಾತಿ, ವಿಶಾಖಾ, ಅನುರಾಧಾ, ಜೇಷ್ಠ, ಮೂಲ, ಪೂರ್ವಾಷಾಢ, ಉತ್ತರಾಷಾಢ, ಶ್ರವಣ, ಧನಿಷ್ಠ, ಶತಭಿತ, ಪೂರ್ವಾಭಾದ್ರ, ಉತ್ತರಾಭಾದ್ರ, ರೇವತಿ. ಎಲ್ಲ ನಕ್ಷತ್ರಗಳೂ ಮಳೆ ಸುರಿಸುವುದಿಲ್ಲ.

ಪಾಪ...ಅದು ಕಾಡು ಪಾಪಾ?

2008-07-16T12:36:00.000-07:00

ಹುಲಿ ಚರ್ಮ, ಹಲ್ಲು ಅಥವಾ ಆನೆಯ ದಂತ ಸ್ಮಗ್ಲಿಂಗ್ ಮಾಡುವುದು ಇಂದಿಗೂ ಕೊನೆ ಕಾಣದ ಕೃತ್ಯ. ಇರುವ ಅಲ್ಪ ಅರಣ್ಯದಲ್ಲೇ ಉಳಿದ ವನ್ಯ ಜೀವಿಗಳ ಸಂರಕ್ಷಣೆಗೆ ಅದೆಷ್ಟೋ ಕಾನೂನು- ಯೋಜನೆ. ಕೋಂಟ್ಯತರ ರುಪಾಯಿ ವ್ಯಯ. ಈನಡುವೆ ಹಲವು ವನ್ಯ ಪ್ರಾಣಿಗಳು ಅಳಿವು- ಉಳಿವಿನ ಘಟ್ಟಕ್ಕೆ ತಲುಪಿವೆ. ಅದರಂತೆ, ವನ ಮನುಷ್ಯ ಎಂದು ಕರೆಯುವ ಮುಗ್ದ, ಸೂಕ್ಷ್ಮ ಪ್ರಾಣಿ ಕಾಡುಪಾಪಾ ವಿಪತ್ತಿನಲ್ಲಿರುವ ಜೀವಿ. ಶ್ರೀಲಂಕಾ, ದಕ್ಷಿಣ ಭಾರತದಲ್ಲಿ ಮಾತ್ರ ಇರುವ( Slender lories)ಕಾಡುಪಾಪಾ ರಕ್ಷಣೆ ಯಾರ ಹೊಣೆ?

ಅರಣ್ಯನಾಶ ಅದೆಷ್ಟೂ ವಿಪತ್ತಿಗೆ ಆಹ್ವಾನ ನೀಡಿದೆ. ಕಾಡು ಬಿಟ್ಟು ನಾಡಿಗೆ ಮಾನವ ಬಂದಿದ್ದರೂ ಕಾಡಿನ ಅವಲಂಬನೆ ತಪ್ಪಿಲ್ಲ. ಅರಣ್ಯ ಉತ್ಪನ್ನಕ್ಕೆ ದಿನದಿಂದ ದಿನಕ್ಕೆ ಬೇಡಿಕೆ ಹೆಚ್ಚುತ್ತಲೇ ಇದೆ. ಹಾಗೇ, ಅರಣ್ಯವಾಸಿ ಜೀವಿಗಳ ಮೌಲ್ಯವೂ ಏರುತ್ತಿದೆ. ಅಂತಾರಾಷ್ಟ್ರೀಯ ಮಟ್ಟದ ಕಳ್ಳ ವ್ಯವಹಾರಕ್ಕೆ ನಮ್ಮ ಪಕ್ಕದ ಗೇರುಸೊಪ್ಪಾ ಅರಣ್ಯವೋ, ಕತ್ತಲೆಕಾನು, ಶರಾವತಿ ನದಿ ಪ್ರದೇಶವೋ ಅಥವಾ ಇನ್ನಾವುದೋ ದಟ್ಟ ಅರಣ್ಯವೇ ಮೂಲ. ಅಪರೂಪದ ಸಸ್ಯ, ಬೇರು, ಪ್ರಾಣಿ ಎಲ್ಲವೂ ಸ್ಮಗ್ಲಿಂಗ್ ವಸ್ತುಗಳಾಗಿಬಿಟ್ಟಿದೆ. ಕಾಡುಪಾಪಾ ಇಂಥ ಕಳ್ಳ ಸಾಗಣೆಗೆ ಸಿಕ್ಕಿದ ಮುಗ್ದ ಜೀವಿ.
ಶ್ರೀಲಂಕಾ, ದಕ್ಷಿಣ ಭಾರತದ ಅರಣ್ಯ ಪ್ರದೇಶ ಕಾಡುಪಾಪಾದ ಮೂಲ ನೆಲೆ. ಹಗಲೆಲ್ಲಾ ನಿದ್ದೆ ಮಾಡುವ ಕಾಡುಪಾಪಾ ಕಾಣಸಿಗುವುದೇ ಅಪರೂಪ. ಮರದ ಮೇಲೆಯೇ ಜೀವನ ಕಳೆಯುವ ಜೀವಿ ನೆಲಕ್ಕೆ ಇಳಿಯುವುದೂ ಕಡಿಮೆಯೇ. ದಟ್ಟ ಅರಣ್ಯದಲ್ಲಿ ಮರದಿಂದ ಮರಕ್ಕೆ ದಾಟುತ್ತಲೇ ಕ್ರಮಿಸುವುದು ಕಾಡುಪಾಪಾ ಜೀವನ ಶೈಲಿ. ಮರದ ಮೇಲೆ ಓಡಾಟ, ಆಹಾರ ಭೇಟೆ, ನಿದ್ದೆ, ಸಂತಾನೋತ್ಪತ್ತಿ.. ಹೀಗೆ
ಈ ಪ್ರಾಣಿ ಇಂದು ವಿಪತ್ತಿನಲ್ಲಿದೆ. ಒಂದು ಕಾಲದಲ್ಲಿ ರಾಜ್ಯದ ಪಶ್ಚಿಮ ಘಟ್ಟ ಪ್ರದೇಶ ಕಾಡುಪಾಪಾಕ್ಕೆ ಸುರಕ್ಷಿತ ನೆಲೆಯಾಗಿತ್ತು. ಕ್ಷೀಣಿಸಿದ ಈ ಜೀವ ಸಂತತಿಗೆ ಇಂದು ಮೌಲ್ಯ ಹೆಚ್ಚಿದೆ. ಕಾಡುಪಾಪಾ ಕಳ್ಳಸಾಕಣೆಯೂ ಹೆಚ್ಚಿದೆ.

ಬೇಡಿಕೆ ಯಾಕೆ: ಕಾಡುಪಾಪಾವನ್ನು ವನ ಮನುಷ್ಯ ಎಂದೂ ಕರೆಯುತ್ತಾರೆ. ಈ ಚಿಕ್ಕ ಪ್ರಾಣಿಯನ್ನು ತಿನ್ನುವ ಬಗ್ಗೆ ಮಾಹಿತಿ ಇಲ್ಲ. ಇದು ರಾತ್ರಿ ಸಂಚಾರಿ. ಹಗಲು ಹೊತ್ತಿನಲ್ಲಿ ಚಲನ- ವಲನ ವಿರಳ.ಕೆನೆತ್ ಅಂಡರ್‌ಸನ್ ಕೆನರಾ ಫಾರೆಸ್ಟ್‌ನಲ್ಲಿ ಬೇಟೆ ಮಾಡುವಾಗ ಕಾಡು ಪಾಪಾ ಅಡ್ಡಿಪಡಿಸಿದ್ದು ಮತ್ತು ಈ ಪ್ರಾಣಿಯ ಕಣ್ಣಿಗೆ ಬೇಡಿಕೆ ಇರುವುದನ್ನು ಪುಸ್ತಕದಲ್ಲಿ ಉಲ್ಲೇಖಿಸಿದ್ದಾರೆ ಎನ್ನುತ್ತಾರೆ ಶ್ರೀಧರ್ ಭಟ್. ಮಾಟಮಂತ್ರದಲ್ಲಿ ಕಾಡಾಪಾಪಾದ ಕಣ್ಣು ಬಳಸುತ್ತಾರೆ. ಕಣ್ಣಿನ ದೋಷ ಇರುವವರು ಈ ಚಿಕ್ಕ ಪ್ರಾಣಿಯ ಕಣ್ಣು ತಿಂದರೆ ವಾಸಿಯಾಗುತ್ತದೆ ಎಂಬ ಮೂಢನಂಬಿಕೆ ಇದೆ. ಹೊರ ದೇಶಗಳಲ್ಲಿ ಕಾಡು ಪಾಪಾ ಸಾಕುತ್ತಾರೆ ಎಂಬ ಅಭಿಪ್ರಾಯಯವೂ ಇದೆ. ಜಾವಾದ ಪಕ್ಷಿ ಮಾರುಕಟ್ಟೆಯಲ್ಲಿ ಕಾಡು ಪಾಪಾ ಮಾರಾಟದ ಕುರಿತು ಇಂಟರ್‌ನೆಟ್‌ನಲ್ಲಿ ಅಲ್ಪ ಸ್ಪಲ್ಪ ಮಾಹಿತಿ ಕಾಣುತ್ತದೆ.
ಚಿಕ್ಕ ಕೀಟ, ಹಣ್ಣು, ಚಿಗುರು ಎಲೆ, ಕೀಟದ ಮೊಟ್ಟೆ, ಮರ ಕಪ್ಪೆ, ಕೆಲವು ಜಾತಿಯ ಹೂವುಗಳು ಈ ಪ್ರಾಣಿಯ ಆಹಾರ. ಹಗಲು ಪೂರ್ತಿ ನಿದ್ದೆ ಮಾಡುವ ಕಾಡುಪಾಪಾ ಸಂಜೆಯಾಗುತ್ತಿದ್ದಂತೆ ಕ್ರಿಯಾಶೀಲವಾಗುತ್ತದೆ. ಮೂರ್ತಿ ತುಂಬಾ ಚಿಕ್ಕದು. ಅಂದರೆ, ಕಾಡಾಪಾಪಾದ ತೂಕ ೮೫ರಿಂದ ೩೫೦ ಕಿ.ಗ್ರಾಮ್. ಎತ್ತರವೂ ಅಷ್ಟೆ ೬.೫ ರಿಂದ ೧೦.೫ ಇಂಚು ಮಾತ್ರ. ೧೫ ವರ್ಷ ಜೀವಿತ ಅವಧಿ. ಬೆಲೆ ಮಾತ್ರ ಸ್ಥಳೀಯರಿಗೆ ಗೊತ್ತಾಗುವುದಿಲ್ಲ. ಹತ್ತಾರು ಸಾವಿರ ಇರಬಹುದು ಎಂದರೂ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಲಕ್ಷ ರು. ಬೆಲೆ ಇರಬಹುದು ಎಂಬುದು ಅಂದಾಜು. ಆದರೆ, ಇಲ್ಲಿ ಹಿಡಿದ ಕಾಡುಪಾಪಾವನ್ನು ಎಲ್ಲಿಗೆ ಸಾಗಿಸಲಾಗುತ್ತದೆ ಎಂಬ ಮಾಹಿತಿ ಸಷ್ಟವಿಲ್ಲ.
ಉತ್ತರ ಕನ್ನಡದ ಕೆನರಾ ವಲಯದ ಗೇರುಸೊಪ್ಪಾದಲ್ಲಿ ಕಾಡು ಪಾಪಾ ಹೆಚ್ಚಿನ ಸಂಖ್ಯೆಯಲ್ಲಿದೆ. ವೈಡ್ ಲೈಫ್ ಪ್ರೆಟೆಕ್ಶನ್ ಆಕ್ಟ್ ಪ್ರಕಾರ ಕಾಡು ಪಾಪಾವನ್ನು ಶೆಡ್ಯೂಲ್ ೧ ಎನಿಮಲ್ ಎಂದು ಪರಿಗಣಿಸಲಾಗಿದೆ. ಇದನ್ನು ಕೊಲ್ಲುವುದು, ಮಾರಾಟ, ಸಾಗಾಟ ಮಾಡಿದವರನ್ನು ಜಾಮೀನು ರಹಿತ ಬಂಧನ ಮಾಡಲು ಅವಕಾಶವಿದೆ .ವರ್ಷಗಶ ಹಿಂದೆ ಉತ್ತರ ಕನ್ನಡದ ಹೊನ್ನಾವರದಲ್ಲಿ ಅರಣ್ಯ ಇಲಾಖೆ ಸಿಬ್ಬಂದಿ ೫ ಕಾಡುಪಾಪಾವನ್ನು ಹಿಡಿದು ತಂದಿದ್ದ ಇಬ್ಬರನ್ನು ಬಂಧಿಸಿದ್ದರು. ವಸತಿ ಗೃಹವೊಂದರಲ್ಲಿ ಅದನ್ನು ಬಚ್ಚಿಟ್ಟು, ಕಳ್ಳ ಸಾಗಣೆಗೆ ಹೊಂಚು ಹಾಕಿದ್ದರು. ಇದು ಒಂದು ಸಿಕ್ಕಿ ಬಿದ್ದ ಪ್ರಕರಣ. ಈ ಮೊದಲು ಎಷ್ಟು ಕಾಡು ಪಾಪಾ ಕಳ್ಳ ಸಾಗಣೆಯಾಗಿದೆಯೋ ಏನೋ?
ಇಂಟರ್‌ನ್ಯಾಷನಲ್ ಯೂನಿಯನ್ ಫಾರ್ ಕನ್‌ರ್‌ವೇಷನ್ ಆಫ್ ನೇಚರ್- ಕಾಡು ಪಾಪಾವನ್ನು ರೆಡ್‌ಲಿಸ್ಟ್‌ನಲ್ಲಿ ಸೇರಿಸಿದೆ. ವಿಶ್ವದ ವಿಪತ್ತಿನಲ್ಲಿರುವ ಇರುವ ಪ್ರಾಣಿ ವರ್ಗದಲ್ಲಿ ಕಾಡುಪಾಪಾವೂ ಒಂದು. ಕರ್ನಾಟಕದ ಪಶ್ಚಿಮ ಘಟ್ಟ ಪ್ರದೇಶದಲ್ಲಿರುವ ಕಾಡು ಪಾಪಾ ದಿನದಿಂದ ದಿನಕ್ಕೆ ಕಡಿಮೆಯಾದರೆ, ಕಣ್ಮರೆ ಅಸಾಧ್ಯದ ಮಾತೇನಲ್ಲ. ಅರಣ್ಯ ಇಲಾಖೆ ಈ ಸೂಕ್ಷ್ಮ ಪ್ರಾಣಿಯ ಸಂರಕ್ಷಣೆ, ಸ್ಥಿತಿಯ ಅಧ್ಯಯನದತ್ತ ಗಮನ ಹರಿಸದಿರುವುದೂ ವಿಷಾದಕರವೇ.
ಕರ್ನಾಟಕದ ಪಶ್ಚಿಮ ಘಟ್ಟ(ಉತ್ತರ ಕನ್ನಡ ಜಿಲ್ಲೆಯ ಕೆನರಾ ಅರಣ್ಯ ವಲಯದಲ್ಲಿ ಕಾಡುಪಾಪಾ ಸಾಕಷ್ಟಿದೆ), ಆಂಧ್ರಪ್ರದೇಶದ ಅರಣ್ಯದಲ್ಲಿ ಅಳಿಯುತ್ತಿರುವ ವನ್ಯ ಜೀವಿಯ ಸಮಸ್ಯೆಯ ಅಧ್ಯಯನ ಮಾಡುವವರು ಯಾರು? ವನ ಮನುಷ್ಯನನ್ನು ಬದುಕಿಸುವರು ಯಾರು?

ಸುರಿದೀತೆ ಹನಿ ಹನಿ ಮಳೆ?

2008-07-05T23:02:00.001-07:00

‘ಮುಂಗಾರು ಮಳೆ’ ‘ಚೆಲ್ಲಾಟ’ ಆಡುತ್ತಿದೆ. ಜೂನ್ ತಿಂಗಳು ಕಳೆದರೂ ರಾಜ್ಯದಲ್ಲಿ ಮಳೆರಾಯ ಮಣ್ಣಿಗೆ ತಂಪು ನೀಡಿಲ್ಲ. ಅಲ್ಲಲ್ಲಿ ಮಳೆಗಾಗಿ ಪ್ರಾರ್ಥಿಸಿ ಕತ್ತೆ, ಕಪ್ಪೆ ಮದುವೆ ಅಲ್ಲದೆ ಮೆರವಣಿಗೆಯೂ ಶುರುವಾಗಿದೆ. ಹಾಗಾದರೆ ನೈಸರ್ಗಿಕವಾಗಿ ಸುರಿಯುವ ಮಳೆಯನ್ನು ಮಾನವ ಯತ್ನದಿಂದ ಧರೆಗಿಳಿಸಲು ಸಾಧ್ಯವೇ? ಮಳೆಗಾಗಿ ವಿಮಾನ ಏರಿ ಮೋಡ ಭಿತ್ತನೆ ಮಾಡಿದರೆ ಸುರಿದೀತೆ ಹನಿ ಹನಿ ಮಳೆ? ಬಿಟ್ಟು ಬಿಡಿ ಇಂಥ ವ್ಯರ್ಥ ಪ್ರಯತ್ನಗಳನ್ನೆಲ್ಲಾ ಹಾಗೆ ಸುಮ್ಮನೆ ಎನ್ನುತ್ತೀರಾ? ಜಾನಪದ, ಧಾರ್ಮಿಕ ಆಚರಣೆಯಲ್ಲಿ ಮತ್ತೆ(ಮೂಢ)ನಂಬಿಕೆಯಿಂದ ಜನ ಮಳೆಗಾಗಿ ಏನೆಲ್ಲ ಮಾಡುತ್ತಾರೆ? ಮಳೆಗೊಂದು ಆಚರಣೆ ಅದೆಷ್ಟು ಫಲಪ್ರದ? ಸುರಿದೀತೆ ಭುವಿಗೆ ಮಳೆ?
ಹಸಿರುಟ್ಟೀತೆ? ಹಸನಾದೀತೆ ಬದುಕು?

‘ಭರಣಿ ಸುರಿದ್ರೆ ಭರಗಾಲ್ದ ಭಯವಿಲ್ಲ’, ‘ಭರಣಿ ಹುಯ್‌ದ್ರೆ ಧರಣಿ ತುಂಬ ಬೆಳೆ’ ಹೀಗೆ ಮೊದಲ ಮಳೆಯ ಕುರಿತು ಬಗೆ ಬಗೆಯ ಗಾದೆ ಮಾತುಗಳಿವೆ. ನಂಬಿಕೆಗಳಿವೆ. ಆ ಮೊದಲ ಮಳೆ ಸುರಿಯದೇ ಇದ್ದಾಗ ರೈತ, ಜನ ಕಂಗೆಡುತ್ತಾರೆ. ಮಳೆಗಾಗಿ ವಿವಿಧ ಆಚರಣೆಗೆ ಮುಂದಾಗುತ್ತಾರೆ.
ಚೈತ್ರ ಮಾಸದಿಂದ ಕಾರ್ತಿಕ ಮಾಸದ ವರೆಗಿನ ಮಳೆ ನಕ್ಷತ್ರಗಳ ಮೇಲೆ ಹೆಚ್ಚು ನಂಬಿಕೆಗಳು, ಆಚರಣೆಗಳು ಕೇಂದ್ರೀಕೃತವಾಗಿದೆ. ಅಶ್ವಿನಿ, ಭರಣಿಯಿಂದ ಮಘಾ ನಕ್ಷತ್ರದ ವರೆಗೆ ಮಳೆ ಸುರಿಯುತ್ತದೆ ಎಂಬ ವಾಡಿಕೆ.
ಇದಕ್ಕೆ ಜನಪದ ಎನ್ನಿ. ಧಾರ್ಮಿಕ ಅಥವಾ ನಂಬಿಕೆ, ಮೂಢ ನಂಬಿಕೆ ಎಂದೇ ಕರೆದುಕೊಳ್ಳಿ. ಮಳೆಗಾಗಿ ರೈತರಲ್ಲಿ, ಬುಡಕಟ್ಟು ಜನಾಂಗದವರಲ್ಲಿ ವೈವಿಧ್ಯಮಯ ಆಚರಣೆ ಇದೆ. ಭಕ್ತಿ, ಕಳಕಳಿ ಇದೆ. ಜೀವಜಲಕ್ಕಾಗಿ ಸಲ್ಲಿಸುವ ಪ್ರಾರ್ಥನೆ, ಆಚರಣೆ ಆಶ್ಚರ್ಯವನ್ನೂ ಹುಟ್ಟಿಸುತ್ತದೆ. ಪ್ರಶ್ನೆಗಳನ್ನೂ ಹುಟ್ಟಿಸುತ್ತದೆ. ಗ್ರೀಕ್, ರೋಮನ್ ಕಾಲದಿಂದ ಇಂದಿನ ವರೆಗೂ ಮಳೆಯ ಕುರಿತ ಆಚರಣೆಗಳು ಪ್ರಚಲಿತದಲ್ಲಿದೆ. ಆಫ್ರಿಕಾದ ಬುಡಕಟ್ಟು, ಚೀನಾದ ರೈತರೂ ನಮ್ಮಂತೆ ಇಂದಿಗೂ ಮಳೆಯ ಕುರಿತು ಯಂತೆಂಥದೋ ಆಚರಣೆ ಮಾಡುತ್ತಾರೆ. ಆದರೆ ಧರೆಗೆ ಸುರಿವ ಮಳೆಮಾತ್ರ ತನಗೆ ಯಾವುದೂ ಸಂಬಂಧ ಇಲ್ಲ ಎಂಬಂತೆ ಸುರಿದು ಬಿಡುತ್ತದೆ. ಮೊದಲ ಮಳೆಯೇ ಕೆರೆ ಒಡ್ಡು ಒಡೆಯುವಷ್ಟು, ನಾಲ್ಕಾರು ಜನರ ಸಾವಿಗೆ ಕಾರಣವಾಗುವಷ್ಟು ಸುರಿದು ಬಿಡುತ್ತದೆ. ಮುಂಗಾರು ಚೆನ್ನಾಗಿ ಸುರಿಯಿತೆಂದು ಬೀಜ ಬಿತ್ತಿದರೆ, ಮೊಳಕೆ ಒಣಗಿ, ಜೀವನ ಕಳೆದುಕೊಳ್ಳುವಂತ ಸಂಕೀರ್ಣ ಸ್ಥಿತಿಯೂ ಇಂದಿದೆ. ಆದರೆ ಆಚರಣೆ ಬಿಟ್ಟೀವೆ ನಾವು? ಮಳೆ ಬೇಡವೆಂದು ಕೈಕಟ್ಟಿ ಕುಳಿತಾರೆಯೇ ರೈತರು? ಮಳೆ ದೇವನ ನೆನೆಯದೇ ಕೃಷಿ ಹಸನಾದೀತೆ?
ಬಿಸಿಲು ಮಳೆ, ಮಂಗನ ಮದುವೆ
ಇರುವೆ ದಿಬ್ಬಣ, ಚೋರಟೆ ಚಕ್ಕುಲಿ
ನಂಜುಳೆ ಪಾಯ್ಸ
ಮಳೆಗಾಗಿ ಹೀಗೆ ಹಾಡಿ ಕುಣಿವ ಮಕ್ಕಳಾದಿಯಾಗಿ ಎಲ್ಲರಲ್ಲೂ ಮಳೆಯ ಕುರಿತು ಒಂದೊಂದು ಕಲ್ಪನೆಇದೆ.
ಟಿ ಏನೆಲ್ಲ ಆಚರಣೆಗಳು:ಕದಂಬರ ನಾಡು, ಬನವಾಸಿಯ ಆದಿ ಮಧುಕೇಶ್ವರ ದೇವರ ಪರ್ಜನ್ಯ ಸುತ್ತಮುತ್ತಲಿನ ನಾಡಿಗೆಲ್ಲ ಪರಿಚಿತ. ಇಲ್ಲಿನದು ಭಕ್ತಿ ಪ್ರಧಾನ ಕಾರ್‍ಯ. ಸಂಕಲ್ಪಮಾಡಿ ಮಧುಕೇಶ್ವರ ಲಿಂಗವನ್ನು ಪೂರ್ತಿ ನೀರಲ್ಲಿ ಮುಳುಗಿಸಿ ಮಳೆ- ಬೆಳೆ ಪಡೆಯುವ ಸಂಪ್ರದಾಯ. ಗರ್ಭಗುಡಿಯೊಳಗೆ ವಶಿಷ್ಟ ತೀರ್ಥದ ನೀರು ತುಂಬುತ್ತಾರೆ. ಲಿಂಗ ಮುಳುಗಿ ಮೇಲ್ಬಾಗದಲ್ಲಿ ಕನಿಷ್ಟ ಮೂರು ಇಂಚು ನೀರು ನಿಲ್ಲಿಸುತ್ತಾರೆ. ಬಳಿಕದ ೨೪ ಗಂಟೆಯಲ್ಲಿ ಮಳೆ ಸುರಿಯುತ್ತದೆ. ಈಗ ಎರಡು ವರ್ಷದ ಹಿಂದೆ ಪರ್ಜನ್ಯ ಮಾಡಲಾಗಿತ್ತು.
ಟಿ ನರ್ತನ, ಹಾಡು, ಮದುವೆ :ಮಳೆಗಾಗಿ ಉತ್ತರ ಕನ್ನಡ ಜಿಲ್ಲೆಯ ಬುಡಕಟ್ಟು ಜನಾಂಗದ ಹಾಲಕ್ಕಿ, ಗೊಂಡ ಜನಾಂಗದವರು ನರ್ತಿಸುತ್ತಾರೆ. ಅದು ತಾರ್ಲೆ ಕುಣಿತ. ಮಳೆಗಾಗಿ ಹಾರೈಸುತ್ತಾರೆ. ಇಲ್ಲಿ ಹೆಣ್ಣು ಮಕ್ಕಳು ಹೊಲದಲ್ಲಿ ಮಳೆಗಾಗಿ ನರ್ತಿಸುತ್ತಾರೆ. ಬೆದ್ರಂಡೆ ಹೊನ್ನಾವರ ಭಾಗದ ಆಚರಣೆ. ಹೊಲದಲ್ಲೇ ನರ್ತಿಸುತ್ತಾರೆ. ಬಳಿಕ ಸಾಂಕೇತಿಕವಾಗಿ ಮದುವೆ ಮಾಡುತ್ತಾರೆ. ತಾರ್ಲೆ ಮತ್ತು ಬೆದ್ರಂಡೆ ಕುಣಿತಕ್ಕೆ ಪಧ್ಯಗಳೂ ಇವೆ. ಲಂಬಾಣಿ ಜನಾಂಗದವರು ಮಳೆರಾಜನ ಕುಣಿತ ಮಳೆಗಾಗಿಯೇ ಇದೆ. ಈ ಹಾಡು ಹಾಡಿ ಕುಣಿದರೆ ಮಳೆಯಾಗುತ್ತದೆ ಎಂಬ ನಂಬಿಕೆ.
ಮಳೆಯ ಪ್ರತೀಕವಾದ ಕಪ್ಪೆಯನ್ನು ಕತ್ತೆಯ ಮೇಲೆ ಕುಳಿಸಿ ಊರತುಂಬಾ ಮೆರವಣಿಗೆ ಮಾಡುವ ಪದ್ಧತಿ ರೂಢಿಯಲ್ಲಿದೆ. ಮಳೆರಾಯ ಮತ್ತು ಕಪ್ಪೆಯ ಸಂಬಂಧ ಗಾಢವಾಗಿಯೇ ಇದೆ. ಉತ್ತರ ಕರ್ನಾಟಕದಲ್ಲೆಲ್ಲ ಮಳೆಗಾಗಿ ಆಚರಿಸುವ ಜೋಕುಮಾರ ಆಚರಣೆ ಬಲು ಪ್ರಸಿದ್ಧ. ಮಳೆಗಾಗಿ ಸಾಮೂಹಿಕ ಸಂತರ್ಪಣೆ ಮಾಡುವುದು, ವಿರಾಟಪರ್ವ ಓದಿಸುವುದೂ ಇದೆ. ಜೀವಂತ ಕಪ್ಪೆಯನ್ನು ಬಟ್ಟೆಯಲ್ಲಿ ಕಟ್ಟಿ ಒನಕೆಯ ತುದಿಗೆ ಕಟ್ಟುತ್ತಾರೆ. ಅದನ್ನು ಹಿಡಿದುಕೊಂಡು ಊರಿನ ತುಂಬಾ ಸುತ್ತುವುದು ಹಾಸನ ಪ್ರದೇಶದಲ್ಲಿರುವ ರೂಢಿ. ಜನರೆಲ್ಲ ಸೇರಿ ಮೆರವಣಿಗೆ ಹೊರಟು ಊರ ಹೊರಗಿನ ಪ್ರದೇಶದಲ್ಲಿ ಗುಂಡಿ ತೋಡುತ್ತಾರೆ. ಅಲ್ಲಿ ಸಿಪ್ಪೆ ಸಹಿತ ತೆಂಗಿನ ಕಾಯಿ ಹೂತರೆ ಮಳೆ ಬರುತ್ತದೆ ಎಂಬ ನಂಬಿಕೆಯೂ ಹಾಸನ ಕಡೆಯಿದೆ. ಕತ್ತೆ, ಕಪ್ಪೆ ವಿವಾಹ ಮಾಡುವ ಕ್ರಮ ಕೊಪ್ಪಳ ಸೇರಿದಂತೆ ಹಲವೆಡೆ ಪ್ರಚಲಿತದಲ್ಲಿದೆ.
ಮಳೆಗಾಗಿ ಬೋರ್ಗಲ್ಲಿಗೆ ನೀರು ಹಾಕುವ ಪರಂಪರೆ ಹಾವೇರಿ ಜಿಲ್ಲೆ ದೇವರಗುಡ್ಡದಲ್ಲಿದೆ. ಮೊನ್ನೆಯಷ್ಟೇ ಹುಯ್ಯೋ ಹುಯ್ಯೋ ಮಳೆರಾಯ ಎಂದು ಮಳೆರಾಯನಿಗೆ ಮೊರೆಇಟ್ಟಿದ್ದಾರೆ ಅಲ್ಲಿನ ಜನ. ಬೋರ್ಗಲ್ಲಿಗೆ ಹಾಕಿದ ನೀರು ಪೂರ್ವ ದಿಕ್ಕಿಗೆ ಹರಿಯಬೇಕು ಎಂಬ ನಂಬಿಕೆ. ೧೦೧ ಪುರುಷರು ಒದ್ದೆ ಬಟ್ಟೆಯಲ್ಲಿ ನೀರು ಹಾಕಿದರೆ, ೫ ವರ್ಷದೊಳಗಿನ ೫ ಬಾಲಕರು ಬೆತ್ತಲೆಯಾಗಿ ಕೊಡದಲ್ಲಿ ನೀರು ಹೊತ್ತು ಬೋರ್ಗಲ್ಲಿಗೆ ಹಾಕುತ್ತಾರೆ.
ಕ್ರೌರ್‍ಯವೆನ್ನೋಣವೇ?:ಮಳೆಗಾಗಿ ಕೆಲವು ಕ್ರೂರ ಕ್ರಮಗಳೂ ಇದೆ ಎಂಬುದು ಗಮನಾರ್ಹ. ತಾಳ್ಮೆ ಕಳೆದುಕೊಂಡು ವಿಚಿತ್ರ ಎನಿಸುವ ಆಚರಣೆಗಳು ಆಚರಿಸಲ್ಪಡುತ್ತವೆ. ಜೀವಂತ ಹಂದಿಯನ್ನು ಕುತ್ತಿಗೆ ವರೆಗೆ ಹುಗಿದು, ಅದಕ್ಕೆ ಆಹಾರ- ನೀರು ಕೊಡದೆ ಕಿರುಚಾಡಿ ಸಾಯುವಂತೆ ಮಾಡುವ ಕ್ರಮವೂ ನಮ್ಮಲ್ಲಿದೆ. ಮಳೆ ದೇವರನ್ನು ಬೈಯುವ, ಮಳೆಯ ಪ್ರತೀಕವಾದ ಕಪ್ಪೆಯನ್ನು ಬಿಸಿಲಿನಲ್ಲಿಟ್ಟು ಹಿಂಸಿಸುವ ಪದ್ಧತಿಯೂ ಇದೆ. ಕೆರೆಕಟ್ಟೆಯ ಮೇಲಿರುವ ದುಗ್ಗಮ್ಮ ದೇವರಿಗೆ ಕೋಲಾರದ ಕಡೆ ಕಲ್ಲು ಬೀರುತ್ತಾರೆ. ಜೋಕುಮಾರನ ವಿಗ್ರಹಕ್ಕೆ ಕೀಟ, ಹುಳುಗಳನ್ನು ಬಿಡುವುದೂ ನಮ್ಮವರಿಗೆ ಗೊತ್ತಿದೆ.
ಕುಮಟಾ ತಾಲೂಕಿನ ಧಾರೇಶ್ವರದಲ್ಲಿ ಮಳೆಗಾಗಿ ಮಾಡುವ ಆಚರಣೆ ಭಿನ್ನ, ಕಠಿಣ ಅಷ್ಟೇ ಘೋರವಾದದ್ದು. ಮಳೆ ಬರದೆ ಬರದ ಸ್ಥಿತಿ ಬಂದಾಗ, ಕೆರೆಯಲ್ಲಿರುವ ಈಶ್ವರ ಲಿಂಗವನ್ನು ರಥ ಬೀದಿಗೆ ತಂದಿಡುತ್ತಾರೆ. ಮೆಣಸಿನ ಕಾಯಿಯನ್ನು ನುಣ್ಣಗೆ ನುರಿದು ದೇವರ ಕಣ್ಣಿಗೆ ಹಚ್ಚುತ್ತಾರೆ. ತಲೆತಲಾಂತರದಿಂದ ಇರುವ ಈ ಆಚರಣೆಯನ್ನು ಮೂರು ವರ್ಷದ ಹಿಂದೆ ಮಾಡಿದ್ದರು. ಲಿಂಗಕ್ಕೆ ಮೆಣಸಿನ ಖಾರಾ ಹಚ್ಚಿ ಮೂರು ದಿನ ಇಟ್ಟಿದ್ದರು.
ಇದೊಂದು ವಿಚಿತ್ರ ಸಂಪ್ರದಾಯ. ಓದಿ ಬೈದುಕೊಳ್ಳಬೇಡಿ. ಉತ್ತರ ಕರ್ನಾಟಕ ಮತ್ತು ಮಲೆ ನಾಡಿನ ಕೆಲವೆಡೆಯೂ ಇದು ಇದೆ. ಜೂನ್ ಎರಡನೇ ವಾರ ಹಾವೇರಿ ಜಿಲ್ಲೆಯ ದೂದಿಹಳ್ಳಿಯಲ್ಲಿ ಇದನ್ನು ಆಚರಿಸಿದ್ದು ಲೇಟೆಸ್ಟ್ ಇವೆಂಟ್. ಹೂತಿರುವ ಶವಕ್ಕೆ ದೇವರ ಹೆಸರಲ್ಲಿ ಸುಣ್ಣದ ನೀರು ಬಿಟ್ಟರೆ ಮಳೆಯಾಗುತ್ತದೆ ಎಂಬುದು ಒಂಥರಾ ನಂಬಿಕೆ. ಹಿಂದಿನಿಂದ ಬಂದದ್ದನ್ನೇ ತಾವೂ ಮಾಡಿದ್ದೇವೆ ಎಂದು ಹೆಣಕ್ಕೆ ಸುಣ್ಣದ ನೀರು ಬಿಟ್ಟ ದೂದಿಹಳ್ಳಿ ಜನ ಹೇಳಿಕೊಂಡಿದ್ದಾರೆ. ಪಲ್ಲಕ್ಕಿಯಲ್ಲಿ ಬೀರಪ್ಪ ದೇವರನ್ನು ಕುಳಿಸಿಕೊಂಡು ಒಂದಷ್ಟು ಜನರು ಸ್ಮಶಾನಕ್ಕೆ ತೆರಳಿದರು. ಹೆಣ ಹೂತಲ್ಲಿ ಅಗೆದು ತಲೆಬುರುಡೆಗೆ ಸುಣ್ಣದ ನೀರು ಬಿಟ್ಟರು. ಆದರೆ ಬಳಿಕದ ಒಂದೆರಡು ದಿನದಲ್ಲೂ ಮಳೆ ಮಾತ್ರ ಸುರಿಯಲಿಲ್ಲ! ತೊನ್ನು ಇರುವರು ಮೃತಪಟ್ಟಾಗ ಅವರ ಶವವನ್ನು ಹೂತರೆ ಸುತ್ತಲಿನ ಊರಲ್ಲಿ ಮಳೆಯಾಗುವುದಿಲ್ಲ ಎಂಬ ನಂಬಿಕೆಯೂ ಇದೆ. ಅಂತಹ ಶವವನ್ನು ಸುಡುವ ಅಥವಾ ಶವ ಹೂಳುವಾಗ ಉಪ್ಪು ಹಾಕಿ ಹೂಳುವ ನಂಬಿಕೆಯೂ ಇದೆ.
ಹಿಂದೂ ವೇದ, ಪುರಾಣದಲ್ಲಿ ವರುಣ ದೇವ ಮಳೆಯ ಅಧಿಪತಿ. ಸಿಡಿಲು- ಮಳೆಯ ಸೃಷ್ಠಿಗೆ ಈ ದೇವರೇ ಕಾರಣ. ಪರ್ಜನ್ಯ -ಮಳೆಗೆ ಕಾರಣವಾದ ಒಂದು ಯಜ್ಞ. ವರುಣ ಸೂಕ್ತವನ್ನು ಪಠಿಸಿ ಮಳೆಗೆ ಪ್ರಾರ್ಥಿಸಲಾಗುತ್ತದೆ. ಮಳೆಗಾಗಿ ವರುಣದೇವರನ್ನು ಪ್ರಾರ್ಥಿಸುವ ಶ್ಲೋಕ ಹೀಗಿದೆ:
ಯತ್ಕಿಂಚೇದಂ ವರುಣ
ದೈವೇ ಜನೇಧಿ ದ್ರೋಹಂ ಮನುಷ್ಯಾ ಶ್ಚರಾಮತಿ
ಅಚಿತ್ತಿ ಯತ್ತವ ಧರ್ಮಾ ಯುಯೋಪಿಮ ನಸ್ತಸ್ಮದೇನಸೋ ದೇವ ರೀರಿಷಹಾ
ಅಂದರೆ:ಎಲ್ಲರಿಂದಲೂ ಸ್ತುತಿಸಲ್ಪಡುವ ಹೇ ವರುಣ ಭಗವಂತನೆ, ಮನುಷ್ಯರಾದ ನಾವು ದೇವ ಸಮಾನರಾದ ಜನಗಳಲ್ಲಿ ತಿಳಿದೋ, ತಿಳಿಯದೆಯೋ ಮಾಡಿದ ಹಿಂಸಾ ಜನಕವಾದ ಕಾರ್‍ಯವನ್ನು ಆಭಿಚಾರಿಕ ಕ್ರಿಯೆಗಳ ಮೂಲಕ ಮಾಡಿದ್ದೇವೆಯೋ ಹಾಗೆಯೇ ಏಕಾಗ್ರತೆ ಇಲ್ಲದೆ ಪ್ರಮಾಧದಿಂದ ನಿನಗೆ ಪ್ರೀತಿಯುಂಟುಮಾಡುವ ಕಾರ್‍ಯಗಳನ್ನು ನಾಶಮಾಡಿದ್ದೇವೆಯೋ, ಅದರಿಂದುಂಟಾದ ಪಾಪಸಮೂಹಗಳನ್ನು ಕಾರಣವಾಗಿಟ್ಟುಕೊಂಡು ನಿನ್ನ ಆರಾಧಕರಾದ ನಮ್ಮನ್ನು ಹಿಂಸಿಸದೆ ವೃಷ್ಠಿಯನ್ನುಂಟುಮಾಡು.
‘ಕಾರಿರೀಷ್ಟಿ’ ಎಂಬ ಯಜ್ಞ ಮಳೆಗಾಗಿಯೇ ಇದೆ. ಮಳೆಗೆ ಉಂಟಾದ ಪ್ರತಿಬಂಧಕ ನಿವಾರಣೆಯನ್ನು ಈ ಯಜ್ಞದಿಂದ ಮಾಡುತ್ತಾರೆ. ಇವೆಲ್ಲ ಪುರಾಣ, ಜಾನಪದ, ನಂಬಿಕೆ ಎಂದೆಲ್ಲ ಹೇಳಬಹುದು. ಈಗ ಏನಿದ್ದರೂ ವಿಜ್ಞಾನ, ಕಂಪ್ಯೂಟರ್ ತಾಂತ್ರಿಕತೆಯದ್ದೇ ಮೇಲುಗೈ. ಮಳೆಗಾಗಿ ಮೋಡ ಬಿತ್ತನೆಯ ಕಾಲ. ವಿಮಾನದಲ್ಲಿ ಭಾನಿಗೆ ತೆರಳಿ ಕಪ್ಪು ಮೋಡದ ಮೇಲೆ ರಾಸಾಯನಿಕ ಸಿಂಪಡಣೆ. ಆ ಮೂಲಕ ಮೋಡ ತಂಪುಗೊಳಿಸಿ ಭೂಮಿಗೆ ಗಂಗೆ ಇಳಿಸುವ ತಂತ್ರಜ್ಞಾನ. ಜಾನಪದ, ಪರ್ಜನ್ಯಕ್ಕಿಂತ ಲಕ್ಷಾಂತರ ರು. ವೆಚ್ಚ ಮಾಡಿ ಮಳೆ ಸುರಿಸುವ, ಧರೆಗೆ ಇಳಿಸುವ ಕಾರ್‍ಯದ್ದೇ ಕಾರುಬಾರು. ಕಳೆದ ಎರಡು ವರ್ಷದ ಹಿಂದೆ ರಾಜ್ಯ ಮಳೆಯ ಅಭಾವ ಕಂಡಾಗ ಸರ್ಕಾರ ಇದನ್ನೇ ಮಾಡಿತ್ತು. ಮೋಡ ಭಿತ್ತನೆ ಯೋಜನೆ ಪ್ಲಾಪ್ ಆಯಿತು. ಲಕ್ಷಾಂತರ ರು. ನೀರಿನಲ್ಲಿ ತೇಲಿ ಬಿಟ್ಟಂತಾಯಿತು.

ತನು, ಮನದ ಆರೋಗ್ಯಕ್ಕೆ ತೃಣ ಧಾನ್ಯಗಳು

2008-06-27T12:40:00.000-07:00

ಬದಲಾವಣೆ ಗಾಳಿ ನಮ್ಮ ಜೀವನ ಮತ್ತು ಆಹಾರ ಕ್ರಮದಲ್ಲೂ ಗಣನೀಯ ಪ್ರಮಾಣದಲ್ಲಿದೆ. ಸ್ಥಳೀಯ ಮತ್ತು ಕಾಲ ಮಾನಕ್ಕೆ ದೊರೆಯುವ ಆಹಾರವನ್ನು ನಾನಿಂದು ಮರೆತೇ ಬಿಟ್ಟಿದ್ದೇವೆ. ಅಕ್ಕಿ, ಗೋಧಿ ಬಿಟ್ಟರೆ ಅಂಗಡಿ, ಹೊಟೇಲ್ ತಿನಿಸುಗಳೇ ನಮಗೆ ಶ್ರೇಷ್ಠ. ಪರಿಣಾಮ ರಕ್ತದೊತ್ತಡ, ಸಿಹಿಮೂತ್ರ, ಮಾನಸಿಕ ಖಾಯಿಲೆ ಹೀಗೆ ಹತ್ತಾರು ರೋಗಗಳಿಗೆ ಅಂಟಿಕೊಂಡಿದ್ದೇವೆ. ಪೌಷ್ಠಿಕ ಜೊತೆಗೆ ಸಮತೋಲನ ಆಹಾರವಾದ ತೃಣ ಧಾನ್ಯಗಳ ಆಹಾರ ಇಂದು ನಮಗೆಲ್ಲಿಗೊತ್ತಿದೆ?
ಕಿರು ಧಾನ್ಯಗಳ ಆಹಾರ ಸಿಹಿಮೂತ್ರ ರೋಗಿಗಳಿಗೆ ಉತ್ತಮ ಆಹಾರ ಎಂಬುದು ಸರ್ವ ವಿಧಿತ. ರಾಗಿ, ಸಾವೆ, ಬರಗು, ನವಣೆ, ಆರ್ಕ, ಊದಲು ಇವನ್ನು ಕಿರು ಧಾನ್ಯ ಅಥವಾ ತೃಣ ಧಾನ್ಯ ಎಂದು ಕರೆಯುತ್ತಾರೆ. ಚಿಕ್ಕ ಕಾಳಿನ ಈ ಧಾನ್ಯಗಳು ಆರೋಗ್ಯದ ದೃಷ್ಟಿಯಿಂದ ಬಹು ದೊಡ್ಡ ಗುಣದ್ದು. ಅಕ್ಕಿ, ಜೋಳ, ಗೋಧಿಗಿಂತ ಕಿರು ಧಾನ್ಯಗಳಲ್ಲಿ ಸಸಾರಜನಕ, ಕೊಬ್ಬಿನಾಂಶ, ಖನಿಜ, ಲವಣ ಮತ್ತು ನಾರಿನಾಂಶದ ಪ್ರಮಾಣ ಹೆಚ್ಚಿದೆ. ಹೆಚ್ಚಿನ ಪ್ರಮಾಣದಲ್ಲಿ ಸಸಾರಜನಕ(ಶೇ.೭ರಿಂದ ೧೨)ಹೊಂದಿರುವ ಕಿರುಧಾನ್ಯಗಳನ್ನು ಇತರ ಬೇಳೆ ಕಾಳುಗಳೊಂದಿಗೆ ಬಳಸುವುದರ ಮೂಲಕ ಸಮತೋಲನ ಆಹಾರ ಸೇವನೆಯೂ ಆಗುತ್ತದೆ.
ಸುಣ್ಣದ ಅಂಶ ರಾಗಿಯಲ್ಲಿ ಹೆಚ್ಚು ಪ್ರಮಾಣಗಲ್ಲಿದೆ. ರಾಗಿ ಸೇವನೆ ಹಲ್ಲುಗಳ ಬೆಳವಣಿಗೆಗೆ ಮತ್ತು ನಿರ್ವಹಣೆಗೆ ಉಪಯುಕ್ತ. ರಾಗಿ ಮಾಲ್ಟ್ ಬೆಳೆಯುವ ಮಕ್ಕಳಿಗೆ ಉತ್ತಮ ಆಹಾರ ಕೂಡಾ. ಇಂದು ಶಿಶು ಆಹಾರ ತಯಾರಿಕೆಯಲ್ಲಿ ರಾಗಿಯನ್ನು ಹೆಚ್ಚಿನ ಪ್ರಮಾಣದಲ್ಲಿ ಬಳಸಲಾಗುತ್ತಿದೆ. ಸಾವೆ ಮತ್ತು ಊದಲಿನಲ್ಲಿ ಸತುವಿನ ಪ್ರಮಾಣ ಹೆಚ್ಚಿಗೆ ಇದೆ. ಕಿರು ಧಾನ್ಯಗಳನ್ನು ಆರೋಗ್ಯದ ಹಿತ ದೃಷ್ಟಿಯಿಂದ ನಿತ್ಯದ ಆಹಾರದ ಒಂದು ಭಾಗವಾಗಿ ಸೇವಿಸುವಂತೆ ಶಿಫಾರಸು ಮಾಡಲಾಗುತ್ತಿದೆ. ಗಮನಾರ್ಹ ಎಂದರೆ ಅಕ್ಕಿಯ ಬಳಕೆಯಂತೆ ಬಹುತೇಕ ಕಿರುಧಾನ್ಯಗಳನ್ನು ಬಳಸಿ ಎಲ್ಲ ಖಾದ್ಯಗಳನ್ನೂ ತಯಾರಿಸಬಹುದು.
ಪಿಷ್ಟ, ನಿಧಾನವಾಗಿ ಜೀರ್ಣವಾಗುವ, ಹೀರಲ್ಪಡುವ ಮತ್ತು ಹಂತಹಂತವಾಗಿ ಶಕ್ತಿಯಾಗಿ ಪರಿವರ್ತನೆಗೊಳ್ಳುವ ವಿಶಿಷ್ಟಗುಣ ಕಿರುಧಾನ್ಯದ್ದು. ಆದ್ದರಿಂದಲೇ ಇದು ಸಕ್ಕರೆ ಖಾಯಿಲೆ ರೋಗಿಗಳಿಗೆ ಹೆಚ್ಚು ಉಪಯುಕ್ತ ಆಹಾರ. ಕಿರುಧಾನ್ಯಗಳಲ್ಲಿ ಶೇ.೧೦-೧೫ರಷ್ಟಿರುವ ನಾರಿನಾಂಶ ಸಣ್ಣ ಕರುಳಿನ ಕ್ರಿಯೆಗೆ ಸಹಕರಿಸುತ್ತದೆ. ಮಲ ವಿಸರ್ಜನೆಗೆ ಕಿರು ಧಾನ್ಯಗಳ ಆಹಾರ ಪೂರಕ. ಅಲ್ಲದೆ ಮೂಲಾವ್ಯಾಧಿ ಬರದಂತೆ ತಡೆಯುತ್ತದೆ. ಐಸೋಫ್ಲೇವೋನ್, ಲಿಗ್ನಾನ್‌ಗಳಂತಹ ಸಸ್ಯಜನ್ಯ ಚೋದಕಗಳು ದೈಹಿಕ ಮತ್ತು ಮಾನಸಿಕ ತೊಂದರೆ ವಿರುದ್ಧ ರಕ್ಷಣೆ ನೀಡುತ್ತದೆ. ಕಿರುಧಾನ್ಯಗಳಲ್ಲಿರುವ ಸಂರಕ್ಷಕ ಪೋಷಕಾಂಶಗಳು ದೇಹದಲ್ಲಿ ರೋಗ ನಿರೋಧಕ ಶಕ್ತಿಯನ್ನು ಉದ್ದೀಪನಗೊಳಿಸುತ್ತದೆ. ನಿಯಮಿತ ಸೇವನೆಯಿಂದ ಸೋಂಕು ರೋಗಗಳ ವಿರುದ್ಧ ರಕ್ಷಣೆ ಒದಗಿಸುತ್ತದೆ.
ಕಿರುಧಾನ್ಯಗಳಲ್ಲಿರುವ ಕಾಬ್ರೋಹೈಡ್ರೇಟ್ ನಿಧಾನವಾಗಿ ಜೀರ್ಣವಾಗುತ್ತದೆ. ಇದರಲ್ಲಿರುವ ಸೂಕ್ಷ್ಮ ಪೋಷಕ ಧಾತುಗಳು ರೋಗ ನಿರೋಧಕ ಶಕ್ತಿ ಮತ್ತು ದೇಹಕ್ಕೆ ಬೇಕಾಗುವ ಪೌಷ್ಠಿಕಾಂಶ ಕೊಡುತ್ತದೆ. ಭತ್ತವನ್ನು ಪಾಲಿಶ್ ಮಾಡಿ ಅಕ್ಕಿ ಮಾಡುತ್ತಾರೆ. ಆವಾಗ ಪೌಷ್ಠಿಕಾಂಶಗಳೆಲ್ಲ ಹೋಗಿ ಕೇವಲ ಪಿಷ್ಠ ಮಾತ್ರ ಇರುತ್ತದೆ. ಮಿಲೆಟ್‌ನಲ್ಲಿ ಎಲ್ಲ ಪೋಷಕಾಂಶಗಳು ಇದೆ. ನವಣೆ ಗಂಜಿ ಜ್ವರ ಬಂದವರಿಗೆ ಉತ್ತಮ. ಸಜ್ಜೆಯಲ್ಲಿ ಹೆಚ್ಚು ಪ್ರೆಟೀನ್ ಇದೆ. ಕಿರುಧಾನ್ಯಗಳಿಂದ ರವೆ ಮಾಡಬಹುದು. ಭತ್ತದ ಅಕ್ಕಿಯಿಂದ ಮಾಡುವ ಎಲ್ಲ ಆಹಾರವನ್ನು ಕಿರುಧಾನ್ಯದಿಂದ ಮಾಡಲು ಸಾಧ್ಯ ಎನ್ನುತ್ತಾರೆ ಕಿರುಧಾನ್ಯಗಳ ಕುರಿತು ಕೆಲಸ ಮಾಡುತ್ತಿರುವ ತಿಂಬತ್ತುವಿನ ದಿನೇಶ್.
ನವಣೆ : ಹೃದಯರೋಗ, ಕ್ಯಾನ್ಸರ್, ಮೂಲಾವ್ಯಾದಿ, ಮಲಬದ್ಧತೆ, ಮೊದಲಾದ ರೋಗಗಳ ವಿರುದ್ಧ ನವಣೆಯ ಆಹಾರ ರಕ್ಷಣೆ ನೀಡುತ್ತದೆ. ನವಣೆಯಿಂದ, ಅನ್ನ, ಗಂಜಿ, ಮುದ್ದೆ, ರೊಟ್ಟಿ, ತಾಲಿಪಟ್ಟು, ಪಡ್ಡು, ಇಡ್ಲಿ, ದೋಸೆ ತಯಾರಿಸಿ ತಿನ್ನಬಹುದು.
ಸಾವೆ:ಸಿಹಿ ಮೂತ್ರ ರೋಗಿಗಳಿಗೆ ಇದೊಂದು ಉತ್ತಮ ಆಹಾರ ಎಂದು ಪರೀಕ್ಷೆಗಳಿಂದ ದೃಢವಾಗಿದೆ. ಕಡಿಮೆ ಸಕ್ಕರೆ ಪ್ರಮಾಣ, ಕ್ರಮೇಣ ಜೀರ್ಣವಾಗುವ ಕಾರ್ಬೋಹೈಡ್ರೇಟ್ಸ್, ಹೆಚ್ಚಿನ ಪ್ರಮಾಣದ ಕೊಬ್ಬು, ಪಿಷ್ಠ ಮತ್ತು ಲವಣ ಸಾವೆಯಲ್ಲಿದೆ. ಈ ಕಾಳಿನಲ್ಲಿ ನಾರಿನಂಶ ಹೆಚ್ಚು. ಕ್ಯಾಲ್ಶಿಯಂ ಮತ್ತು ರಂಜಕ ಪ್ರಮಾಣವೂ ಸಾಕಷ್ಟಿದೆ. ಅನ್ನ, ರೊಟ್ಟಿ, ಪಾಯಸ, ಚಕ್ಕುಲಿ, ವಡಾ, ಇಡ್ಲಿ, ಹಪ್ಪಳ, ಸಂಡಿಗೆ, ಪಡ್ಡು ಮೊದಲಾದ ತಿಂಡಿ ತಿನಿಸುಗಳನ್ನು ಸಾವೆಯಿಂದ ತಯಾರಿಸಬಹುದು.
ಬರಗು:ಇದರಿಂದಲೂ ಅನ್ನ, ರೊಟ್ಟಿ, ಪಾಯಸ, ಚಕ್ಕುಲಿ, ವಡಾ, ಹಪ್ಪಳ, ಸಂಡಿಗೆ, ಇಡ್ಲಿ, ವಡಾ ಮಾಡಬಹುದು.
ಊದಲುಊದಲಿನಲ್ಲಿ ಅಕ್ಕಿ, ಗೋಧಿಗಿಂತ ಹೆಚ್ಚು (ಶೇ.೧೧)ಸಾರಜನಕವಿದೆ. ಹೆಚ್ಚಿನ ಪ್ರಮಾಣದಲ್ಲಿ ನಾರಿನಾಂಶವಿದೆ. ಕೊಲೆಸ್ಟ್ರಾಲ್ ಅಂಶವನ್ನು ಕಡಿಮೆ ಮಾಡಿ ಹೃದಯ ಖಾಯಿಲೆ ತಡೆಯುತ್ತದೆ. ಅಕ್ಕಿಯಿಂದ ತಯಾರಿಸುವ ಎಲ್ಲ ಆಹಾರ ಪದಾರ್ಥವನ್ನು ಊದಲಿನಿಂದ ತಯಾರಿಸಲು ಸಾಧ್ಯ. ತಯಾರಿಕೆ ವಿಧಾನವೂ ಹೆಚ್ಚು ಕಡಿಮೆ ಒಂದೇ.
ಧಾರವಾಡ ಕೃಷಿ ವಿಶ್ವ ವಿದ್ಯಾಲಯದ, ರಾಣಿಬೆನ್ನೂರಿನ ಹನುಮನಹಟ್ಟಿ ಕೃಷಿ ಸಂಶೋಧನಾ ಕೇಂದ್ರದಲ್ಲಿ ಕಿರು ಧಾನ್ಯಗಳ ಬಗ್ಗೆ ಹಲವು ಸಂಶೋಧನಾತ್ಮಕ ಕಾರ್‍ಯಗಳು ನಡೆದಿದೆ. ತಳಿ ಅಭಿವೃದ್ಧಿ, ಕಿರು ಧಾನ್ಯಗಳ ವಿವಿಧ ಸಂಸ್ಕರಿತ ತಿಂಡಿ ತಿನಿಸುಗಳ ತಯಾರಿಕೆಯಲ್ಲಿ ಕೈಗೊಂಡ ಪ್ರಯೋಗಕ್ಕೆ ಉತ್ತಮ ಫಲಿತಾಂಶ ಸಿಕ್ಕಿದೆ. ಸಾವೆ, ಬರಗು, ಊದಲು, ನವಣೆ, ರಾಗಿಯಿಂದ ಸುಮಾರು ೩೦ಕ್ಕೂ ಹೆಚ್ಚು ತಿನಿಸುಗಳನ್ನು ತಯಾರಿಸಲಾಗಿದೆ. ಧಾರವಾಡದ ಕೃಷಿ ವಿಶ್ವ ವಿದ್ಯಾಲಯದ ಗ್ರಾಮೀಣ ಗೃಹ ವಿಜ್ಞಾನ ಮಹಾವಿದ್ಯಾಲಯದ ಆಹಾರ ಮತ್ತು ಪೋಷಣೆ ವಿಭಾಗದಲ್ಲಿ ನವಣೆಯಿಂದ ತಯಾರಿಸಿದ ‘ಡಯಾಬಿಟಿಕ್ಸ್ ಮಿಕ್ಸ್’ ತಯಾರಿಸಲಾಗಿದ್ದು, ಇದು ಸಕ್ಕರೆ ಕಾಯಿಲೆ ಪೀಡಿತರಿಗೆ ಉತ್ತಮ ಪರ್‍ಯಾಯ ಆಹಾರ ಎಂದು ಪರೀಕ್ಷೆಯಲ್ಲಿ ದೃಢವಾಗಿದೆ. ಈ ಎಲ್ಲ ದೃಷ್ಟಿಯಲ್ಲೂ ಕಿರು ಧಾನ್ಯಗಳು ಉತ್ತಮ ಆಹಾರ. ರಾಗಿಯ ಬಿಸ್ಕೇಟ್, ಮಾಲ್ಟ್ ಈಗಾಗಲೇ ಮಾರುಕಟ್ಟೆಗೆ ಬಂದಿದೆ. ಬೇಬಿ ಫುಡ್‌ಗಳಲ್ಲಿ ರಾಗಿ ಬಳಕೆ ಇದೆ. ನವಣೆ ಚಕ್ಕುಲಿಯೂ ಕೆಲ ಪ್ರಮಾಣದಲ್ಲಿ ಮಾರುಕಟ್ಟೆಯಲ್ಲಿ ಸಿಗುತ್ತದೆ. ನವಣೆಯಿಂದ ಪಾಪ್‌ಕ್ರಾನ್ ಮಾಡುವ ಪ್ರಯತ್ನವೂ ನಡೆದಿದೆ. ಉತ್ತರ ಭಾರದಲ್ಲಿ ನವಣೆ, ಸಾವೆ ಅನ್ನವನ್ನು ಉಪವಾಸದ ಸಮಯದಲ್ಲಿ ಹೆಚ್ಚು ಬಳಸುತ್ತಾರೆ. ಸಾವೆ ಅನ್ನ ಶಕ್ತಿ ಕೊಡುತ್ತದೆ ಮತ್ತು ಉಪವಾಸದ ನಂತರ ಹೊಟ್ಟೆಗೆ ಗಟ್ಟಿ ಆಹಾರ ಬೇಡ ಎಂಬ ಕಾರಣಕ್ಕೂ ಸಾವೆ ಬಳತ್ತಾರೆ. ಆದರೆ ರಾಜ್ಯದಲ್ಲೇ ತೃಣ ಧಾನ್ಯಗಳ ಆಹಾರ ಪದ್ಧತಿ ಕಣ್ಮರೆಯಾಗುತ್ತಿದೆ. ಅಕ್ಕಿ, ಗೋಧಿ ಬಳಕೆ ಹೆಚ್ಚುತ್ತಿದೆ. ನಮ್ಮ ಆರೋಗ್ಯ, ಆಹಾರ ಕ್ರಮದ ಬಗ್ಗೆ ನಾವೇ ಕಾಳಜಿ ವಹಿಸಬೇಕಲ್ಲವೇ?

ವಹಿವಾಟಿಗೆ ವಿದಾಯ ಹೇಳಿದೆ ‘ಪಾರಂಪರಿಕ ಮಾಪಕ’

2008-06-27T12:40:00.001-07:00

ಮೆಟ್ರಿಕ್ ಕ್ರಮ ಜಾರಿಯಲ್ಲಿ ಬರುವ ಮೊದಲು ಕೊಡುಕೊಳ್ಳುವ ವ್ಯವಹಾರ ಮತ್ತು ಆಡಳಿತ ವ್ಯವಹಾರದಲ್ಲಿ ಪಾರಂಪರಿಕ ಮಾಪಕ ಪದ್ಧತಿ ಬಳಕೆಯಲ್ಲಿತ್ತು. ಅಧಿಕೃತವಾಗಿ ೧೯೫೮ರಲ್ಲಿ ಭಾರತದಲ್ಲಿ ಮೆಟ್ರಿಕ್ ಪದ್ಧತಿ ಜಾರಿಗೆ ಬಂದಿದೆ. ಈ ಮೆಟ್ರಿಕ್ ಮಾಪಕ ಪದ್ಧತಿ ಬಳಕೆಗೆ ಬಂದು ನಾಲ್ಕು ದಶಕಗಳು ಉರುಳಿದರೂ ಮನಸ್ಸಿನಿಂದ, ವ್ಯವಹಾರದಿಂದ ಬಿಟ್ಟು ಹೊಗಿಲ್ಲ. ಉತ್ತರ ಕರ್ನಾಟಕ ಗ್ರಾಮೀಣ ಜನರ ಕೊಡುಕೊಳ್ಳುವ ವ್ಯವಹಾರದಲ್ಲಿ ಸೇರು, ಪಾವಿನ ಅಳತೆ ಪದ್ಧತಿ ಅಳಿವಿನಲ್ಲೂ ಉಳಿದಿದೆ. ಹಳ್ಳಿಯಲ್ಲಿ ಬೆಳೆದ ತರಕಾರಿಯನ್ನು ಬೆಳಗಾವಿ ನಗರದಲ್ಲಿ ಮಾರಾಟ ಮಾಡುವ ಹಳ್ಳಿಗರು ತಕ್ಕಡಿ ಮತ್ತು ಅಳತೆ ಕಲ್ಲಿನೊಂದಿಗೆ ಇಂದಿಗೂ ಸೇರು, ಪಾವಿನ ಮಾಪಕಗಳನ್ನು ತಮ್ಮೊಂದಿಗೆ ತರುತ್ತಾರೆ. ಬೆಳ್ಳುಳ್ಳಿ, ಮೊಳಕೆ ಕಾಳುಗಳು, ಜವಾರಿ ಅಕ್ಕಿ, ಅವರೆ ಬೀಜ, ಧಾನ್ಯಗಳನ್ನು ಮಾರಾಟ ಮಾಡುವುದು ಪಾವು, ಸೇರಿನ ಲೆಕ್ಕದಲ್ಲಿಯೆ. ಹೊಸ ತಲೆಮಾರಿನವರು ತಕ್ಕಡಿಯಲ್ಲಿ ಧಾನ್ಯ, ಕೆಲವು ತರಕಾರಿಗಳನ್ನು ತೂಗಿ ಕಿಲೋ ಲೆಕ್ಕದಲ್ಲಿ ಮಾರಾಟ ಮಾಡುತ್ತಾರೆ. ಇಳಿವಯಸ್ಸಿನವರು, ವೃದ್ಧರು ಸೇರು, ಪಾವಿನ ಲೆಕ್ಕಕ್ಕೆ ಅಂಟಿಕೊಂಡಿದ್ದಾರೆ. ಅವರಿಗೆ ಇನ್ನೂ ಈ ನಾಟಿ ಅಳತೆಯೇ ವ್ಯವಹಾರಿಕ ಮಾಪಕ.

ವ್ಯವಹಾರ, ವಸ್ತು ವಿನಿಮಯದಲ್ಲಿ ಅಳತೆ ಅಥವಾ ಮಾಪಕ ಪ್ರಧಾನ. ಘನ ವಸ್ತುಗಳು ಕೆ. ಜಿ. ಲೆಕ್ಕದಲ್ಲಿ ದ್ರವ ಪದಾರ್ಥಗಳನ್ನು ಲೀಟರ್ ಅಳತೆಯಲ್ಲಿ ಇಂದು ವಿನಿಮಯ ಅಥವಾ ವ್ಯವಹಾರ ಮಾಡಲಾಗುತ್ತದೆ. ಇದು ಮೆಟ್ರಿಕ್ ಪದ್ದತಿ. ನಮ್ಮ ಮಾಪಕ ಪದ್ಧತಿ ಬೇರೆಯದೇ ಆಗಿತ್ತು. ಮೆಟ್ರಿಕ್ ಪದ್ಧತಿಯನ್ನು ತೂಕ ಮತ್ತು ಅಳತೆ ಕಾನೂನಿನ ಅಡಿಯಲ್ಲಿ ೧೯೫೮ರಲ್ಲಿ ತರಲಾಗಿದೆ. ೧೯೬೦ರಿಂದ ದೇಶದಾದ್ಯಂತ ಏಕರೂಪದ ಮಾಪಕ ಪದ್ಧತಿ ಜಾರಿಯಾಗಿದೆ. ಹಾಗಾದರೆ ಅದಕ್ಕೂ ಮೊದಲು ನಮ್ಮಲ್ಲಿ ಹೇಗೆ ವಸ್ತು ವಿನಿಮಯ ನಡೆಯುತ್ತಿತ್ತು?
ಕೃಷಿ ಉತ್ಪಾದನೆ, ಬಳಕೆಯ ವಸ್ತುವನ್ನಾಧರಿಸಿ ವಿವಿಧ ಮಾಪಕ ಪದ್ಧತಿ ನಮ್ಮಲ್ಲಿ ಚಾಲ್ತಿಯಲ್ಲಿತ್ತು. ಅದು ದೇಸೀಯ ಮಾಪಕ ಕ್ರಮ. ಇಂದು ಅದು ಪಾರಂಪರಿಕ ಕ್ರಮ. ಈ ಅಳತೆಯೊಂದಿಗೆ ಜನ ಜೀವನದ ವಿವಿಧ ಸಂಬಂಧ, ರೂಢಿ, ಸಂಪ್ರದಾಯವೂ ಥಳಕು ಹಾಕಿಕೊಂಡಿತ್ತು. ಪ್ರದೇಶದಿಂದ ಪ್ರದೇಶಕ್ಕೆ ಭಿನ್ನತೆ ತೋರುವ ಈ ಮಾಪಕ ಕ್ರಮ ಇಂದು ನಮ್ಮಿಂದ ದೂರವಾಗಿದೆ.
ಪಾರಂಪರಿಕ ಅಳತೆ ಸಾಧನಗಳಲ್ಲಿ ಸಿದ್ದೆ, ಪಾಯಲಿ, ಪಾವು, ಕೊಳಗದ ವಿಧಾನವೂ ಒಂದು. ಈ ಅಳತೆ ಪ್ರಮಾಣ ಎಲ್ಲ ಪ್ರದೇಶಗಳಲ್ಲಿಯೂ ಒಂದೇ ತರವಾಗಿರಲಿಲ್ಲ. ಉತ್ತರ ಕನ್ನಡದಲ್ಲಿ ಒಂದು ವಿಧಾನ ಇದ್ದರೆ ದಕ್ಷಿಣ ಕನ್ನಡದ ಮಾಪಕ ಕ್ರಮವೇ ಬೇರೆ. ಉತ್ತರ ಕರ್ನಾಟಕದಲ್ಲಿದ್ದ ಅಳತೆ ವಿಧಾನವೇ ಇನ್ನೊಂದು. ಮೊಹೆಂಜೋದಾರೋ ನಾಗರಿಕತೆಯ ಕಾಲದಲ್ಲಿ ಒಂಬತ್ತು ಭಾಗಗಳ ಚಿಪ್ಪಿನ ಅಳತೆಗೋಲು, ಮತ್ತು ಹರಪ್ಪ ನಾಗರಿಕತೆಯ ಕಾಲದಲ್ಲಿ ತೂಕದ ಬೊಟ್ಟುಗಳು ಬಳಕೆಯಲ್ಲಿದ್ದವು ಎಂದು ಇತಿಹಾಸದಿಂದ ತಿಳಿದು ಬರುತ್ತದೆ. ನಾಗರಿಕತೆಯೊಂದಿಗೆ ಅಳತೆಯ ಸಾಧನ, ವಿಧಾನಗಳೂ ಸುಧಾರಣೆಯೊಂದಿಗೆ ವಿಕಾಸವಾಯಿತು. ಈ ಮಾಪಕ ಪದ್ಧತಿ ಪ್ರಾದೇಶಿಕ ಭಿನ್ನತೆ, ವೈವಿಧ್ಯತೆಯನ್ನೂ ಪ್ರತಿಬಿಂಬಿಸುತ್ತದೆ. ವಿಜಯ ನಗರ ಅರಸರ ಕಾಲದಲ್ಲಿ ಬೀದಿ ಬದಿಗಳಲ್ಲಿ ವಜ್ರ ವೈಡೂರ್‍ಯಗಳನ್ನು ಬಳ್ಳದಲ್ಲಿ ಅಳೆದು ಮಾರುತ್ತಿದ್ದರೆಂಬ ಚರಿತ್ರೆಯ ಮಾತು ನಮ್ಮ ಅಂದಿನ ಮಾಪಕ ಪದ್ಧತಿಯನ್ನು ಪ್ರತಿನಿಧಿಸುತ್ತದೆ.
ಸಿದ್ದೆ: ಕಟ್ಟಿಗೆಯಿಂದ ತಯಾರಿಸಿದ ಒಂದು ಚಿಕ್ಕ ಅಳತೆಯ ಸಾಧನ. ಸಿದ್ದೆ- ಕೊಳಗ ಮಾಪಕದಲ್ಲಿ ಸಿದ್ದೆ ಚಿಕ್ಕ ಅಳತೆಯ ಮಾಪಕ. ಬಿದಿರಿನಿಂದ ತಯಾರಿಸಿದ ಸಿದ್ದೆಯ ಬಳಕೆಯೂ ಇತ್ತು. ‘ಸಿದ್ದೆ ಅಕ್ಕಿ ಕೊಡಮ್ಮಾ’ ಎಂದು ಭಿಕ್ಷುಕರು ಹೇಳುವುದನ್ನು ಕೇಳಿರಬಹುದು. ಸಾಮಾನ್ಯವಾಗಿ ಸಿದ್ದೆಯಲ್ಲಿ ಅಕ್ಕಿ, ಕಾಳುಕಡಿಯನ್ನು ಅಳೆಯುತ್ತಿದ್ದರು. ಒಂದು ಸಿದ್ದೆ ಅಕ್ಕಿ ಈರ್ವರ ಒಂದು ಹೊತ್ತಿನ ಊಟಕ್ಕೆ ಸಾಕಾಗುತ್ತದೆ. ಮಲೆನಾಡಿನಲ್ಲಿ ಊಟಕ್ಕೆ ಅನ್ನ ಮಾಡಲು ಬೇಕಾದ ಅಕ್ಕಿಯನ್ನು ಸಿದ್ದೆಯಲ್ಲಿ ಅಳೆದು ಹಾಕುವ ಪದ್ಧತಿ ರೂಢಿಯಲ್ಲಿತ್ತು.
ನಾಲ್ಕು ಸಿದ್ದೆಗೆ ಪಾವು: ಸಿದ್ದೆಯ ನಂತರದ ಅಳತೆ ಪಾವು. ನಾಲ್ಕು ಸಿದ್ದೆಗೆ ಒಂದು ಪಾವು. ತಾಮ್ರ, ಹಿತ್ತಾಳೆಯಿಂದ ಪಾವಿನ ಅಳತೆ ಮಾಪಕವನ್ನು ಮಾಡುತ್ತಾರೆ.
ಸಿದ್ದೆಯ ನಂತರದ ಮಾಪಕ ಪಾಯಲಿ. ಒಂದು ಪಾಯಲಿ ಎಂದರೆ ೪ ಪಾವು.
ಸಿದ್ದೆ, ಪಾವು, ಪಾಯಲಿ ಇವು ಒಂದು ರೀತಿಯಲ್ಲಿ ಚಿಲ್ಲರೆ ಲೆಕ್ಕ. ಈ ಮಾಪಕಗಳನ್ನು ಬೇಳೆ ಕಾಳು, ಧಾನ್ಯಗಳನ್ನು ಅಳೆಯಲು ಬಳಸುತ್ತಿದ್ದರು. ಕೊಡಕೊಳ್ಳುವ ವ್ಯವಹಾರದಲ್ಲಿ ಇವುಗಳೇ ಅಳತೆಯ ಸಾಧನಗಳು. ಹೆಚ್ಚಿನ ಪ್ರಮಾಣದಲ್ಲಿರುವ ವಸ್ತುಗಳನ್ನು ಅಳೆಯಲು, ವಿನಿಮಯ ಮಾಡಿಕೊಳ್ಳಲು ಕೊಳಗದ ಬಳಕೆಯಾಗುತ್ತಿತ್ತು. ಆದರೆ ಕೊಳಗದ ಅಳತೆಯಲ್ಲೂ ಪ್ರಾದೇಶಿಕ ವ್ಯತ್ಯಾಸ ಕಂಡು ಬರುತ್ತದೆ. ಉತ್ತರ ಕರ್ನಾಟಕ ಕೆಲವು ಭಾಗದಲ್ಲಿ ಕೊಳಗದ ಅಳತೆ ಬದಲಿಗೆ ಬಳ್ಳದ ಪದ್ಧತಿ ಇತ್ತು. ಅಲ್ಲಿಯ ಅಳತೆ ಕ್ರಮ ಬೇರೆಯದೇ ಆಗಿತ್ತು. ಅದು ಹೀಗಿತ್ತು. ೨ನವಟಾಕು- ೧ಚಟಾಕು(ಪಾವು), ೨ ಚಟಾಕು- ೧ ಸೇರು, ೨ ಸೇರು- ಕಾಲು ಪಾವು, ೨ ಪಡಿ- ೧ಗಿದ್ನ ಹೀಗೆ ಸುಮಾರು ೯ ವಿಭಾಗದಲ್ಲಿ ಕೃಷಿ ಉತ್ಪನ್ನಗಳನ್ನು ಅಳೆಯುವ ಕ್ರಮ ಬಳಕೆಯಲ್ಲಿತ್ತು.
ಹೈದ್ರಾಬಾದ್ ನಿಜಾಮರ ಆಡಳಿತ ಕಾಲದಲ್ಲಿ, ಹೈದ್ರಾಬಾದ್ ಗುಲ್ಬರ್ಗಾ ಪ್ರದೇಶದಲ್ಲಿ ಕಚೇರಿ ಅಳತೆ, ಬಝಾರ್ ಅಳತೆಯೆಂದು ಪ್ರತ್ಯೇಕ ಅಳತೆಯಿದ್ದ ಬಗ್ಗೆ ಮಾಹಿತಿಗಳು ದೊರೆಯುತ್ತದೆ. ಇಲ್ಲಿ ಸಿಕ್ಕ, ಕಂಚಾಸ್, ಪುಂಕಾಸ್, ರತೀಸ್, ಮಾಶಾಸ್ ಇನ್ನಿತರ ಮಾಪಕ ಕ್ರಮ ಬಳಕೆಯಲ್ಲಿತ್ತು.
೧೯೭೦ರಲ್ಲಿ ಮೈಸೂರು ರಾಜ್ಯ ಸರ್ಕಾರ ಪ್ರಕಟಿಸಿದ ಕರ್ನಾಟಕ ಪರಂಪರೆ ಪುಸ್ತಕದಲ್ಲಿ ಈ ಪದ್ಧತಿಯ ಕೆಲವು ಮಾಹಿತಿಗಳು ಲಭ್ಯ. ಅಲ್ಲಿರುವಂತೆ: ಬಾದಾಮಿ ಚಾಲುಕ್ಯರ ಕಾಲದಲ್ಲಿ ದೊರೆತ ಕ್ರಿ. ಶ. ೭೩೨-೩ರ ಶಾಸನದಲ್ಲಿ ಮಣ, ಸೇರು, ವೀಶ, ಭಾಂಡಪೇರು ಬಗ್ಗೆ ಉಲ್ಲೇಖವಿದೆ. ಇವುಗಳಲ್ಲಿ ಮಣ ೧೧. ೨ ಕೆ. ಜಿ., ಪೇರು ಎಂಬುದು ೬೪ ಸೇರಿನ ಒಂದು ಕಾಳಿನ ಮೂಟೆಗೆ ಸಮ, ಮೀಸ, ಮೀಶ ಎಂಬುದು ದಕ್ಷಿಣ ಕರ್ನಾಟದಲ್ಲಿ ಪ್ರಚಲಿತವಿತ್ತು. ಭಾಂಡಪೇರು ಎಂಬುದು ಒಂದು ಭಂಡಿಯ ಭಾರದಳತೆ. ಕರ್ನಾಟಕ ಸರ್ಕಾರ ಪ್ರಕಟಿಸಿದ ಕರ್ನಾಟಕ ಪರಂಪರೆ ಪುಸ್ತಕದಲ್ಲಿ ೭೫ ಸೇರು ಭತ್ತದ ಬೆಲೆ ೧೯೩೦ರಲ್ಲಿ ೧ ರುಪಾಯಿ ಇತ್ತು. ೧೯೬೦ರಲ್ಲಿ ಒಂದು ರುಪಾಯಿಗೆ ೧೦. ೫ ಸೇರು ಭತ್ತ ಬರುತ್ತಿತ್ತು ಎಂದು ನಮೂದಿಸಲಾಗಿದೆ.
ಈ ಪಾರಂಪರಿಕ ಅಳತೆ ಸಾಧನಗಳು ಜನರ ಜೀವನದಲ್ಲಿ ಬಳಕೆಯಲ್ಲಿದ್ದ ಬಗೆ ವಿಶಿಷ್ಟ. ಕೃಷಿಕರ ಮನೆಯಲ್ಲಿ ಕೂಲಿ ಮಾಡಿದರೆ ಅವನಿಗೆ ಎರಡುವರೆ ಪಾಯಲಿ ಅಕ್ಕಿಯನ್ನು, ೫ರಿಂದ ೧೦ ರುಪಾಯಿಯನ್ನು ಕೂಲಿಯಾಗಿ ಕೊಡಲಾಗುತ್ತಿತ್ತು. ಇದಕ್ಕೆ ‘ಬಳಿ’ಕೊಡುವ ಪದ್ಧತಿ ಎಂದು ಕರೆಯುತ್ತಾರೆ. ಶಿರಸಿ ತಾಲೂಕಿನ ಸೋಂದಾ ಪ್ರದೇಶದಲ್ಲಿ ಇತ್ತೀಚಿನ ವರೆಗೂ ಚಾಲ್ತಿಯಲ್ಲಿದ್ದ ಪದ್ದತಿ ಇದು. ಗದ್ದೆಗೆ ಬಿತ್ತಲು ಬೇಕಾದ ಭತ್ತವನ್ನು(ಬೀಜ) ಕೊಳಗದ ಅಳತೆಯಲ್ಲಿಯೇ ನಿರ್ಧರಿಸಲಾಗುತ್ತಿತ್ತು. ೨೦ ಕೊಳಗ ಭತ್ತ ಒಂದು ಖಂಡಗ ಭೂಮಿ ಬಿತ್ತನೆಗೆ ಬರುತ್ತದೆ ಎಂಬುದು ಹಿರಿಯರ ಲೆಕ್ಕ. ಒಂದು ಖಂಡಗ ಭೂಮಿ ಎಂದರೆ ೧.೨೫ ಎಕರೆ ಭೂಮಿ ಎಂದು ಆಧುನಿಕ ಲೆಕ್ಕ. ಕರೆವಕ್ಕಲ ಜನಾಂಗದ ಮದುವೆಯ ಶಾಸ್ತ್ರದಲ್ಲಿ ಕೆಂಪು(ಕುಂಕುಮ)ನೀರಿನಲ್ಲಿ ಬಂಗಾರದ ಉಂಗುರವನ್ನು ಹಾಕುತ್ತಾರೆ. ಅದನ್ನು ವರ ಹುಡುಕಿ ತೆಗೆಯುವ ಪದ್ಧತಿ ರೂಢಿಯಲ್ಲಿದೆ. ಆವಾಗ ‘ವಜ್ರ ಕಂಡ್ಯೋ, ವೈಡೂರ್‍ಯ ಕಂಡ್ಯೋ, ೧೨ ಖಂಡುಗ ಹೊಲ ಕಂಡ್ಯೋ’ ಎಂದು ವರನಲ್ಲಿ ಕೇಳಲಾಗುತ್ತದೆ. ೧೨ ಖಂಡುಗ ಹೊಲವನ್ನು ಇಲ್ಲಿ ಪರೋಕ್ಷವಾಗಿ ವಜ್ರ ವೈಡೂರ್‍ಯಕ್ಕೆ ಹೋಲಿಸಿರುವುದನ್ನು ಗಮನಿಸಬಹುದು. ಬುಡಕಟ್ಟು ಜನಾಂಗದ ಹಾಲಕ್ಕಿ ಜನಾಂಗದಲ್ಲಿ ತಿರುಪತಿ ಯಾತ್ರೆಗೆ ಹೋದವರು ಅಲ್ಲಿಂದ ಕೊಳಗವನ್ನು ತರುವ ಪದ್ಧತಿಯಿದೆ. ಚಂದನದ ಕಟ್ಟಿಗೆಯನ್ನು ಮಾಡಿದ ಈ ಕೊಳಗ ಒಡೆದರೆ ಅದನ್ನು ತೇಯ್ದು ದೇವರ ಪೂಜೆಗೆ ಬಳಸುತ್ತಾರೆ. ಸಂಪ್ರದಾಯದಂತೆ ಕೊಳಗವನ್ನು ಸುಡುವುದಾಗಲಿ, ಎಸೆಯುವುದಾಗಲೀ ಮಾಡುವುದಿಲ್ಲ. ಬುಡಕಟ್ಟು ಜನಾಂಗದವರು ಆಚರಿಸುವ ಸುಗ್ಗಿ ಹಬ್ಬ, ಆರ್ದೆ ಮಳೆಹಬ್ಬ, ಹೊಸಕ್ಕಿ ಹಬ್ಬ ಮತ್ತು ದೀಪಾವಳಿ ಹಬ್ಬದಲ್ಲಿ ಸಿದ್ದೆ ಕೊಳಗಗಳನ್ನು ತೊಳೆದು ಪೂಜೆ ಸಲ್ಲಿಸುತ್ತಾರೆ. ಹಲಸು ಮತ್ತಿತರ ಗಟ್ಟಿ ಇರುವ ಮರಗಳಿಂದ ಕೊಳಗ ತಯಾರಿಸುತ್ತಾರೆ. ಕೊಳಗದ ಬಾಯಿ(ತುದಿ) ಒಡೆಯದಂತೆ ತುದಿಯಲ್ಲಿ ಕಬ್ಬಿಣದ ಪಟ್ಟಿಯನ್ನು ಹಾಕುವ ಪದ್ಧತಿಯೂ ಇತ್ತು.
ಸಿದ್ದೆಯ ಅಳತೆ ಕ್ರಮದಲ್ಲಿ ದೊಡ್ಡ ಅಳತೆ ಖಂಡಗ. ಪೂರ್ತಿ ೨೦ ಕೊಳಗಕ್ಕೆ ಒಂದು ಖಂಡಗ. ಇಲ್ಲಿ ಗಮನಿಸಬೇಕಾದ ಸಂಗತಿ, ಭೂಮಿಯನ್ನು ಖಂಡಗದ ಲೆಕ್ಕದಲ್ಲಿ ಅಳೆಯುವುದು ಬೇರೆ, ಭತ್ತವನ್ನು ಖಂಡಗದಲ್ಲಿ ಅಳೆಯುವ ಪದ್ಧತಿ ಬೇರೆ. ಭತ್ತ ಅಳೆಯುವ ಖಂಡಗಕ್ಕೆ ಪ್ರತ್ಯೇಕ ಸಾಧನವಿರಲಿಲ್ಲ. ೨೦ ಕೊಳಗ ಭತ್ತವನ್ನು ಅಳೆದರೆ ಅದನ್ನೇ ಒಂದು ಖಂಡಗ ಎಂದು ಹೇಳುವ ರೂಢಿಯಿತ್ತು. ವಲ್ಲೊ ಎಂಬ ಇನ್ನೊಂದು ವಿಧದ ಮಾಪಕವೂ ಬಳಕೆಯಲ್ಲಿತ್ತು. ಇದು ಕರಾವಳಿ ಮತ್ತು ಕೊಂಕಣಿ ಸಮುದಾಯದಲ್ಲಿ ಹೆಚ್ಚು ಬಳಕೆಯಲ್ಲಿತ್ತು. ವಲ್ಲೋ ಬಿದಿರು, ಬೆತ್ತದಿಂದ ತಯಾರಿಸಿದ ಒಂದು ಅಳೆತೆಯ ಸಾಧನ. ಒಂದು ವಲ್ಲೋ ಎಂದರೆ ಐದು ಪಾಯಲಿ. ಅಕ್ಕಿ ಅಳೆಯಲು ಇದರ ಬಳಕೆ.
ದಣಿದ ಎತ್ತಿಗೆ ಮಣವೇ ಭಾರ, ಮಣಾ ತೂಗದ ತ್ರಾಸು ಖಂಡಿ ತೂಗೀತೇ, ಸೇರು ಹೊರದ ತ್ರಾಸು ಭಾರ ಹೋತ್ತೀತೇ, ಕಂಡುಗವನ್ನು ಬಳ್ಳದಲ್ಲಿ ಅಳೆದಂತೆ ಇವು ಪಾರಂಪರಿಕ ಅಳತೆಯನ್ನು ಹೇಳುವ ಗಾದೆಮಾತುಗಳು.
ಬದಲಾದ ಕಾಲದಲ್ಲಿ ಅಳತೆಯ ಕ್ರಮವೂ ಬದಲಾಗಿದೆ. ಏಕ ರೂಪದ ಮಾರುಕಟ್ಟೆ ವ್ಯವಸ್ಥೆಗಾಗಿ ಮೆಟ್ರಿಕ್ ಪದ್ಧತಿ ಬಂದಿದೆ. ದೇಶ ವಿದೇಶವೂ ಸೇರಿದಂತೆ ಎಲ್ಲಡೆ ಕೆ. ಜಿ. ಅಥವಾ ಲೀಟರ್ ಎಂದರೆ ಒಂದೇ ಪ್ರಮಾಣದ ಅಳತೆಯಾಗಿದೆ. ಒಳಿತು ಕೆಡಕು ಎನ್ನುವ ಅಭಿಪ್ರಾಯಕ್ಕಿಂತ ಜಾಗತೀಕರಣ, ವ್ಯಾಪಾರೀಕರಣದಲ್ಲಿ ಪಾರಂಪರಿಕ, ದೇಸೀಯ ಜ್ಞಾನಕ್ಕೆ ಬೆಲೆಯಿಲ್ಲ.